E presidente Colombiano, Juan Manuel Santos,a bisa su colega Mericano Donald Trump cu America Latino no lo apoya ningun tipo di intervencion militar na Venezuela.
“Nos a reitera na presidente Trump, mi a reitera y e demas paisnan tambe, cu cualkier intervencion militar no lo tin ningun tipo di apoyo di America Latino”, Santos a bisa un grupo di periodista Colombiano despues di reuni cu e mandatario Mericano.
Den e encuentro ey tambe a participa e presidente Brasileño, Michel Temer; di Panama, Juan Carlos Varela, y e vice-presidente Argentino, Gabriela Michetti.
Prome cu e reunion, Trump a urgi pa yega na restauracion pleno di democracia y di libertadnan politico na Venezuela y a sigura cu e situacion ta insostenibel, completamente inaceptabel, y a recorda e sancionnan cu Merca a impone bao di su mandato contra gobierno di presidente Nicolás Maduro.
Di su banda, Santos a bisa cu e reunion tabata “hopi cordial, unda cada un di e participantenan a expresa nan opinion encuanto Venezuela.”
“Nos ta hopi preocupa pa loke ta sucediendo, nos maximo interes ta defende pueblo Venezolano, cu su derechonan keda respeta, cu ta restaura democracia y cu nos discuti e forma y necesidad di coordina entre nos pa trata di produci un transicion cu ta pacifico, cu por mantene e stabilidad y cu ta democratico, Santos a declara.
Den e sentido aki, e gobernante a insisti cu ta necesario traha den recupera democracia pa e Venezolanonan, loke ta clave pa Colombia pasobra esaki ta e pais “mas interesa cu cos ta bay bon pa Venezuela.
E mandatario a aclara cu no a tuma medida exacto den e reunion, sino cu a acorda traha den ekipo y scucha otro mutuamente y opinando entre tur.”
Atrobe, el a reitera e necesidad pa Venezuela libera e presonan politico y tene eleccion limpi sin lastro di fraude.
