(AP)—Presidente Joe Biden a yama Hapon y India paisnan “xenofobico” cu no ta acepta inmigrantenan, poniendo nan den e mesun grupo cu China y Rusia mientras el a purba splica nan circunstancianan economico y a compara e cuatro pais cu Merca riba asunto di inmigracion.
E comentarionan, na un evento di campaña diaranson anochi, a bin solamente tres siman despues cu e White House a anfitriona prome minister Hapones Fumio Kishida pa un bishita oficial, durante cual e dos lidernan a celebra loke Biden a yama un “aliansa irompible,” particularmente riba asuntonan di seguridad global. E White House a anfitriona prome minister Indio Narenda Modi pa un bishita aña pasa.
Hapon ta un aliado clave di Merca. Y India, un di e economianan cu ta creciendo mas rapido na mundo, ta un partner crucial den e Indio-Pacifico a pesar di e diferencia riba derechonan humano. Un fundraiser unda e audiencia tabata mayormente Asia-Mericano, Biden a bisa cu e eleccion Mericano binidero tabata tocante “libertad, Merca y democracia” y cu e economia di e nacion tabata prosperando “danki na abo y hopi mas.”
“Pakico? Pasobra nos ta acepta inmigrantenan,” Biden a bisa. “Wak, pens’e. Pakico China ta kedando atras economicamente? Pakico Hapon ta den problema? Pakico Rusia y India tambe? Pasobra nan ta xenofobico. Nan no kier inmigrantenan.”
E presidente a agrega: “Inmigrantenan ta loke ta haci nos fuerte. Esaki no ta hiperbole, pasobra nos tin un entrada di trahadonan cu kier ta aki y kier contribui.” No tabatin ningun reaccion for di e gobiernonan di Hapon ni India. E vocero di seguridad nacional pa e White House, John Kirby, a bisa cu Biden tabata haciendo un punto mas amplio tocante e posicion di Merca riba inmigracion.
“Nos aliado- y partnernan sa bon den bon presidente Biden ta balora nan, nan amistad, nan cooperacion y e capacidad cu nan ta trece den e spectrum riba un variedad di asunto, no solamente relaciona na seguridad,” Kirby a bisa diahuebs mainta ora a puntr’e tocante e comentarionan di Biden. “Nan ta compronde con hopi e ta balora e idea di aliansa y partnership.”
E comentarionan di Biden ta bin na comienso di e Asian American and Pacific Islander Heritage Month, y el a ser introduci na e fundraiser pa senador Tammy Duckworth, un di e dos senadornan di descendencia Asia-Mericano. El ta un co-presidente nacional pa su campaña di reeleccion.
Hapon a reconoce problemanan cu su poblacion birando mas chikito, y a cantidad di baby naci den e pais den 2023 a cay pa un di ocho aña consecutivo, segun e data publica den februari. Kishida a yama e grado di nacemento abao den Hapon “e crisis mas grandi cu Hapon a enfrenta” y pais ta conoci pa tin un posicion mas cerca riba inmigracion, aunke e gobierno di Kishida a, den e ultimo añanan, cambia su politicanan pa haci’e mas facil pa trahadornan stranhero bin Hapon.
Mientras tanto, e poblacion di India a crece pa ta esun mas grandi na mundo, cu e Organisacion di Nacionnan Uni (ONU) bisando cu e tabata casi yega 1.425 biyon. Su poblacion tambe ta mas jong. Na comienso di aña, India a implementa un ley di ciudadania cu ta monitoria naturalisacion pa Hindunan, Parsis, Sikhs, Buddhistanan, Jains y Cristiannan cu a huy bay India for di Pakistan, Bangladesh y Afghanistan. Pero e ta exclui Musulmannan, ken ta un mayoria den tur tres nacion. E ta e prome biaha cu India a pone un criteria di religion pa ciudadania.
