(AP)—Presidente Joe Biden ta plania pa no atende e discusion anual di clima na Dubai e siman aki, un evento cu ta spera di atrae lidernan di estado y diplomaatnan for di aproximadamente 200 nacion y e Vaticano. Biden a atende e cumbre aki dos biaha den pasado.
E Cas Blanco a bisa cu e ta mandando un ekipo di clima, incluyendo Evio Spacial John Kerry, consehero di clima Ali Zaida y consehero di energia limpi John Podesta. “Aunke nos no tin ningun noticia tocante biahe pa comparti pa e presidente e momento aki, e administracion tin e speransa pa un COP28 productivo y robusto,” segun vocero Angelo Fernández Hernández, agregando cu e ekipo di Biden lo sigui traha riba e accionnan di e administracion “pa aborda e crisis di clima.”
Biden tambe a priminti pa bishita Africa net prome cu aña cera, pero ta parce cu e biahe ey tampoco lo tuma luga. E Cas Blanco no a ofrece ningun motibo, pero e presidente ta hopi involucra den ambos e guera na Ucrania y e conflicto entre Israel y Hamas, como tambe batayanan domestico cu congreso tocante fondo di gobierno. E conferencia di COP28 ta cuminsa diahuebs y ta ser convoca anualmente pa e Nacionnan Uni. COP ta un abreviacion pa “Conference of the Parties”—e nacionnan cu a acorda di un framework di cambio di clima crea pa NU na 1992. E conferencia aki a tuma luga 28 biaha, pues e aña aki e ta ser yama COP28.
Paisnan cu a firma e acuerdo a priminti pa traha pa stabilisa e emisionnan di gas di efecto invernadero y preveni interferencia humano “peligroso” cu e sistema di clima. Na meta ta pa descustuma mundo di combustibelnan fossiel cu ta subiendo e temperatura di Tera.
E aña aki, Emiratos Árabes Unidos, e di cinco productor di azeta mas grandi na mundo, ta anfitrionando e discusionnan di clima. E conflictonan den parti oost di Europa y Oriente Medio por haci cooperacion entre e nacionnan aun mas dificil. Y Sultan al-Jaber a ser apunta como presidente-designa, un decision cu a ser critica ampliamente pa activistanan di clima pasobra e ta sirbi como CEO di Abu Dhabi National Oil Co., cual ta buscando pa aumenta su produccion di azeta crudo cu ta emiti carbon y gas natural.
Biden a yama cambio di clima e “menasa mas grandi pa humanidad.” Na comienso di luna, el a publica un evaluacion riba e estado di cambio di clima na Merca y a bisa cu e problema tabata afectando tur region den e pais: “no solamente un par, tur,” manera el a bisa. “Cualkier hende cu ta nenga e efectonan di cambio di clima ta condenando e pueblo Mericano pa un futuro peligroso,” el a bisa.
Bao di su tenura, Merca a aproba e Inflation Reduction Act, e respuesta mas significante di Merca pa cambio di clima, y a pusha pa mas fabricacion di energia limpi. E acto ta diseña pa stimula energia limpi riba un scala cu lo cambia e direccion di emisionnan di gas di efecto invernadero Mericano.
