(AP) — Presidente Israeli, Isaac Herzog a adverti presidente Mericano, Joe Biden riba un “reto” creciendo for di Iran, mientras Tehran ta continua su accion brutal contra protestanan masal lidera pa ciudadanonan Irani hoben y esfuersonan di Merca pa rebiba e acuerdo nuclear cu Iran ta fracasando.
Na comienso di un reunion den Oficina Oval cu Biden, Herzog a nota cu tabata 40 dia desde morto di Mahsa Amini den custodia di seguridad Irani, cual a impulsa e protestanan na Iran. El a nota tambe cu Iran ta “moviendo den direccion” di bira un poder nuclear, y a aludi na Tehran proveyendo Rusia cu dronennan cu ta “asesinando ciudadanonan inocente na Ucrania”. “Mi ta kere e reto di Iran ta un reto mayor cu nos ta discutiendo”, el a bisa.
Oficialnan Israeli a apela na Biden cu rebibando e acuerdo nuclear di 2015 no ta bay stop Tehran di logra su ambicionnan nuclear y lo desestabilisa e region. Adminsitracion di Biden, sinembargo, te cu recientemente tabata parce determina pa trece back e acuerdo, cu lo duna Iran biyones di dollar den alivio di sancion a cambio pa e pais hala atras su programa nuclear na e limitenan imponi.
Pero e administracion ta zona cada bes mas pesimista tocante e pronostico pa e acuerdo den simannan recien mientras Iran a manda drone na Rusia pa usa den e guera contra Ucrania y a responde cu brutalidad contra e protestanan lidera pe hende muhe contra e gobierno Islamico cu a cuminsa mas di un luna atras.
Oficialnan di Cas Blanco a bisa den dianan recien cu nan no ta enfoca riba diplomacia cu Iran na e momento aki y ta buscando pa sostene e manifestantenan cu a subi caya.
Biden no a menciona Iran den su comentarionan breve na reporteronan na comienso di su reunion cu Herzog, pero vocero di Conseho di Seguridad Nacional di Cas Blanco, John Kirby a bisa cu Biden a recorda Herzog di e promesa di e administracion pa sigura cu Iran nunca ta adkiri un arma nuclear.
Biden a felicita Israel pa su acuerdo di limite maritimo cu Libanon, cual ta bay firma awe. E acuerdo cu a yega despues di lunanan di mediacion Mericano ta marca un avance mayor den relacionnan entre Israel y Libanon, cual formalmente ta den guera desde establecimento di Israel na 1948. E acuerdo ta provee pa desaroyo di camponan di energia na beneficio di ambos pais.
Contestando tocante e critica di presidente Ucraniano, Volodymyr Zelenskyy cu Israel te awo no a provee arma avansa y sistema di defensa na Kyiv, Kirby a sugeri cu Merca no ta bay “culpa” Israel pa e asunto. “Esey ta pa e Israelitanan dicidi”, Kirby a bisa.
Herzog a reuni diamars cu Secretario di Estado, Antony Blinken y presidente di Congreso, Nancy Pelosi como parti di su bishita rapido na Washington.
E bishita di Herzog tambe ta yega mientras violencia ta aumentando den West Bank. Forsanan Israeli riba diamars a ataca un teritorio controla pa un grupo arma den e di dos ciudad mas grandi den West Bank, rementando un laboratorio di bom y participando den tiramento, ehercito a bisa. A mata cinco Palestino y a herida 20, segun Ministerio di Salud Palestino.
Lidernan Congresional Mericano a invita Herzog pa dirigi su mes na un reunion conhunto di Congreso mientras Israel ta prepara pa celebra su di 75 aniversario proximo aña. E fecha pa discurso di Herzog no ta poni ainda. Estado di Israel a wordo proclama dia 14 di mei 1948. Presidente Harry S. Truman a reconoce e nacion nobo e mesun dia.
Den e carta di invitacion, Pelosi y lider di mayoria den Senado, Chuck Schumer a bisa cu e dos nacion a comparti “un laso inkebrantable cu raiz den seguridad comun, balornan comparti y amistad.”
