E fin di siman aki, fundacion Venezolano Uni na Aruba tin un actividad di recaudacion di fondo pa medio di un bazaar.
Sra. Magyory Medina kende ta presidente di e fundacion aki kier informa henter comunidad cu awe y mañan nan tin na bazaar na Bakval 12-C (Noord) for di mainta te atardi.
E fundacion aki a wordo lanta casi tres aña pasa inicialmente pa yuda e hendenan na Venezuela, pero tambe di tur nacionalidad cu ta den necesidad na Aruba. Particularmente esunnan cu tin necesidad di cuminda, principalmente awor cu e crisis di e Covid a dal nos.
E fundacion aki ta percura pa duna cuminda cayente tur diadomingo pa un grupo di 85 mucha. Awor nan kier haci e obra humanitario aki cu adultonan.
E fundacion aki tin mester di recauda fondo. Dos siman pasa nan a dicidi di organisa un sorto di bazaar caminda nan ta bende diversidad di articulo pa un florin. Pa medio di e reanudacion di fondo aki e fundacion kier traha un sopi pa reparti tur diadomingo den un districto diferente rond di Aruba pa esunnan cu mester di cuminda cayente.
“Nos lo reparti sopi pa tur hende cu mester di dje,” Sra. Medina a bisa na Bon Dia Aruba. Nan lo bay cu nan propio tent y cu ayudo di polis e fundacion nan boluntarionan lo para den sitio strategico pa reparti sopi.
Pa brinda e ayudo aki, nan a organisa e bazaar aki di dos dia consecutivo, unda nan ta bende pa 1 florin sapatonan di diferente size. Nan tin pañanan pa mucha di edad entre 0 pa 15 aña. Tambe nan tin pañanan pa hende homber y hende muhe. Ademas nan lo tin benta di sopi di galiña na balor di 5 florin pa esun chikito y 10 florin pa sopi grandi. Nan ta haci un yamado pa henter comunidad por duna sosten na e bunita proyecto aki.
