(AP) — Na Francia, ora presidentenan ta cana memey di publico, ta describi nan como “bañando den multitud.” Emmanuel Macron a tuma un baño hopi friu ayera.
Enfrentando criticonan cu a grita pa su renuncia, e lider Frances a tira su mes den e dificil tarea di repara e daño haci na su presidencia door di forsa e aplicacion di reformanan impopular di pensioen, tumando su prome “baño den multitud” desde cu a aplica e ley siman pasa.
E bishita na oriente di Francia, cerca di frontera cu Alemania, tabata parti di un esfuerso coordina di Macron y su gobierno pa pone e furor causa pa e cambio di pensioen su tras. Aumentando e edad di retiro di 62 pa 64 aña a ocasiona un ola di protesta di lunas largo na Francia.
E clima di malcontento ta menasa e habilidad di Macron di pasa algun otro politica planea den e cuatro aña restante den su segundo y ultimo termino como presidente. E por a wak pa su mes con infeliz hende ainda ta ora el a cana entre su pueblo na Selestat.
Un homber a bisa Macron cu su gobierno ta “corupto” – un acusacion cu Macron inmediatamente a rechasa. “Pronto bo lo cay! Bo ta bay wak,” e homber a bisa.
Canando door di multitud, cu tabata tras di un barera di metal, Macron a argumenta pa su reforma di pensioen pero tambe a reconoce cu tabata “impopular.” “No ta haci niun hende feliz pa traha mas y pa mas largo,” el a bisa. Asina mes el a insisti cu e no ta bay keda sin mescla cu hende. Macron generalmente ta un fan di baña den multitud, pa disgusto di su detaye di seguridad, y no ta sconde pa su criticonan. “Mi a pasa den pio,” el a bisa.
Su tras, algun a grita “retira, Macron!” of a canta un cantica cu a bira un himno di e protestanan pa retiro.
Anteriormente ayera durante un bishita na un compania specialisa den edificio di palo, un protesta silencioso a ricibi Macron: legislador Emmanuel Fernandes di e partido di ultra-iskierda, La France Insoumise, a presenta cu su boca tapa pa e number 49-3, un referencia na e articulo constitucional cu gobierno a usa pa forsa e reforma di pensioen sin voto door di parlamento.
Despues, den trankilidad di oficina di alcalde di Selestat, Marcon ripitidamente a insisti cu Francia mester bay dilanti cu otro prioridadnan. El a cita cambio climatico, secura y otro asunto. “Nos no ta semper un pais cu ta trankil, pero nos mester avansa,” el a bisa reporteronan.
Door di boluntariamente enfrenta multitudnan hostil, Macron tabata parce di purba di kibra e imagen cu su politiconan a pinta di dje como teniendo idea of no sa di con hende ta biba. “Mi no ta sordo,” el a bisa paden di e gemeente. “Tin hende cu ta hopi rabia. Mi ta respeta nan.”
El a ripiti cu si no reforma e sistema di pensioen lo a carga e futuro generacionnan cu debe. Sindicato y otro oponentenan ta argumenta cu pagadonan di impuesto afluente of companianan mester paga mas na su lugar, y ta mira e reforma como e erosion di e red di seguridad social Frances.
No disuadi pa e hostilidad ayera, Macron a priminti di continua biahando door di e pais. “Nos mester continua splicando y bayendo dilanti cu e resto,” el a bisa.
Macron despues a enfrenta grito pafo pa duna algun man. El a bay cu manifestantenan gritando: “Retiro na 60: Nos a lucha pa hay’e y nos ta bay lucha pa keda cune.”
Sindicato iskierdista CGT tabatin protesta planea pa awe. Tur sindicato principal di Francia a bisa cu ta bay tene protestanan na nivel nacional dia 1 di mei pa coincidi cu Dia Internacional di Trahado.
