Presidente di Colombia, Iván Duque a califica e sugerencia di informe di Oficina di Alto Comisionado di ONU pa Derechonan Humano (ACNUDH) como un ‘intromision den e soberania’. Ademas, e preocupante cifranan riba masacre y asesinato publica den e documento ta demostra cu Colombia ta hopi leu di logra e paz tan anhela.
Duque ta preocupa cu ‘no ta bisa e berdad’ riba a avancenan cu su Gobierno a haci den materia di plannan di desaroyo, e implementacion di acuerdo di paz cu e ex-guerrilla FARC, entre otro.
Pero, maske ONU a lubida of no alaba tur e logro di Gobierno di Duque, loke nan no por nenga ta e ‘horibel’ situacion di e defensornan di derechonan humano na Colombia, manera Michel Forst, relator special di ONU, a califica nan situacion.
E cifranan publica den e informe di ONU ta alarmante. Por ehempel, den un capitulo ta lesa cu na 2019 a asesina 108 defensor na Colombia, 66 lider indigena y 45 miembro di comunidad LGBTI.
Segun informacion di agencia EFE, ACNUDH tambe a registra 36 masacre, e cifra mas halto desde 2014 y cu ta presenta memey di un cifra di homicidio di 25 pa cada 10.000 habitante.
“Di acuerdo cu e documento, e asesinato di hende muhe defensor di derechonan humano a aumenta cu 50%. Tur esaki specialmente den zona cu nivel eleva di pobresa, poco empleo, cultivonan ilegal, loke ta rekeri di un presencia integral di e Estado”, revista Semana a afirma.
Pa e representante di ACNUDH na Colombia, Alberto Brunori, ‘e informe ta haci un balans riba e acuerdo di paz, e habilidad como reintegracion, e compromiso di e ex-combatiente cu paz y na mesun tempo e retonan cu tin’ den temanan manera ‘reforma rural integral, e asesinato di defensornan di derechonan humano y di ex-combatiente’.
