Dialuna Presidente Dominicano Danilo Medina a defende dilanti congreso di Republica Dominicana, cu e proceso di investigacion tocante soborno di empresa di Brasil Odebrecht ta bay poco poco, asina tambe a defende e acuerdo caminda gobierno Dominicano a renuncia pa cuminsa proceso hudicial contra ehecutivo di compania Odebrecht.
“E acuerdo no ta stop e proceso di investigacion”, Danilo Medina a sigura ora cu el a papia prome biaha tocante e scandal di empresa Odebrecht. E acuerdo ta trata cu gobierno por habri huicio contra funcionario local y intermediario comercial di Republica Dominicana pero no contra ehecutivo di Odebrecht. Hopi organización civil a solicita creacion di un comision di fiscal independiente pa investiga tur soborno cu apoyo di Nacion Uni, y asina identifica e hendenan cu a haya algun beneficio for di nan.
Medina no a duna respuesta na solicitud di e gruponan civil. Medina a recorda dilanti di congreso, momento cu el a duna cuenta di su prome informe anual di su di dos administracion, cu via acuerdo cu Odebrecht e compania aki lo apaga un multa di 184 miyon dollar na Republica Dominicana. E cantidad aki ta dobel di e cantidad cu a paga na soborno. Medina a bisa cu ningun otro pais a logra un compromiso asina halto. E acuerdo mester aprobacion di congreso, pero a genera hopi indignacion entre organisacionnan di comunidad caba , pasobra e ta laga caminda habri pa empresa manera Odebrecht continua cu nan operacion na Dominicana y asina por participa den otro proceso di licitacion di obra publico den futuro.
Medina a purba di no papia nada tocante e topico di soborno pa 92 miyon dollar cu ehecutivo di Odebrecht a acepta cu nan a paga na Republica Dominicana y asina logra contratonan cu gobierno. Odebrecht a participa desde 2001 na 17 obra di infrastructura importante na Dominicana. Cerca di 7 obra a ser construi durante prome gobierno di Medina (2012-2016). E scandal a lanta sentimento di rabia den pueblo, Medina a reconoce. Presidente a bisa cu no mester pura e investigacion, pasobra te awor procuraduria no a haya ningun hende cu a haya beneficio for di Odebrecht, despues di dos luna di investigacion.
Si nos ta pura e investigacion ey, por caba den impunidad, kier men no aplicacion di husticia di manera corecto, Danilo Medina a splica. Procuraduria a acepta compromiso cu gobierno di Brasil, pa asina duna tur informacion tocante soborno pa luna di mei venidero, mientras cu e acuerdo cu Odebrecht ta obliga e empresa aki pa duna apoyo den e investigacion di ministerio publico. Ora cu autoridad di Dominicana por haya tur informacion, nos lo percura pa husticia”. Organisacionnan di sociedad civil a entrega representante di gobierno mas di 312 mil firma cu a ser recogi durante tres siman, pa asina solicita creacion di un comision di fiscal independiente cu mester investiga e caso aki cu apoyo di Nacion Uni.
Ehecutivo di Odebrecht a reconoce dilanti autoridad di Brasil y Merca cu desde 2001 a paga soborno di 785 miyon dollar na 12 pais, y cu a paga na Republica Dominicana cerca di 92 miyon dollar tambe.
