ORANJESTAD – Dialuna ultimo, e sindicatonan cu ta representa e empleadonan publico: TOPA, SEPPA, SPA y SADA a sostene un reunion cu gobierno representa pa prome minister, Evelyn Wever-Croes y minister di husticia, Andin Bikker.
Presidente di TOPA, Rene Bernabela a declara na Bon Dia Aruba cu esaki tabata e prome reunion cu e bloke di sindicatonan di empleadonan publico ta sinta cu gobierno. El a cualifica e prome reunion aki como ‘exitoso’.
Sinembargo, un minister clave den e reunion aki, Xiomara Ruiz-Maduro, kende ta encarga cu e cartera di finansa y asunto economico, no tabata presente pa motibo cu e tabatin otro compromiso. E tabata un agenda cu varios punto, algun di nan stagna pa basta tempo.
Agenda cu varios punto
Segun sindicalista Bernabela den e reunion aki nan a cuminsa trata temanan cu di basta tempo no tabatin atencion riba nan. Un di nan tabata e tema di bashi premie di e pensionadonan cu a sali entrante 1 di januari 2015. E sindicalista a indica cu e tempo aya, ex- minister di finansa, Angel Bermudez a pone den su carta cu esaki lo tin efecto riba gelijkbedrag pa empleadonan publico activo cu ta trahando actualmente den gobierno.
Otro tema cu nan a trata cu minister presidente den presencia di minister Bikker, tabata e asunto di indexering. Presidente di TOPA a laga sa cu gobierno a priminti cu nan lo haci ehercicio necesario pa atende cu indexering a base di e calculacion di costo di bida (inflacion). Nan lo pone esaki den man di un comision tecnico, pa cuminsa revisa e tipo di beneficio aki pa empleado publico.
E ta haya cu no ta posibel pa loke ta trata costo di bida di productonan den tur establecimento cu ta sigui subi, ‘pero e florin di nos cartera ta sigui bira menos’. Nan kier yega na un acuerdo cu gobierno pa sikiera den e parti di indexering nan por encontra otro. Pero e forma con nan por resolve e problemanan cu e empleadonan publico ta pasando aden, conhuntamente cu gobierno como partner.
Un pone cu TOPA ta considera relevante den e reunion aki, y cu nan a trata cu minister presidente Wever-Croes, tabata e comision central GOA (Georganiseerd Overleg Ambtenaren Zaken), cu e sindicatonan ta desea cu e wordo reactiva y actualisa. Bernabela a señala na e matutino aki cu pa basta aña esaki a bira un tema ‘hopi keto,’ cu no a wordo traha nunca riba dje.
P’esey e bloke di sindicatonan di e sector publico a bisa gobierno cu nan ta kere cu e gremio sindical mester ta un partner social, caminda nan lo por tin dialogo cu gobierno pa actualisa e situacion di empleadonan publico. E sindicatonan aki kier sa con empleadonan publico ta para actualmente, mirando cu tin basta aña cu nan no ta haya un aumento, y cu costo di bida si ta aumenta keto bay.
Na final di e reunion aki nan a yega na acuerdo, cu despues cu e sindicatonan aki a entrega tur e documentonan necesario na minister presidente, Wever-Croes, y esunnan presente di gobierno, caminda dentro di poco gobierno ta bay cuminsa haci studio riba e topiconan cu nan a trata.
Bernabela a laga sa cu dentro di poco, kiermen prome cu fin di luna yega, gobierno lo invita e sindicatonan aki un biaha mas pa atende un reunion riba e puntonan di e agenda cu nan a trata dialuna ultimo. “Pa nos ta sumamente di importancia, mirando e echo cu e gelijkbedrag, bashi premie, indexering y comision central di GOA, pa nos ta na mesa cu gobierno,” el a bisa na Bon Dia Aruba.
E sindicatonan aki kier sigui cu e tipo di dialogo aki pa wak con nan ta bay atende e tres puntonan aki. Presidente di TOPA a remarca cu pa nan ta importante pa tin un trankilidad aworaki den e clase laboral.
