Ora nos a kere cu e asunto di e retiro di e ministro encarga cu entre otro Infrastructura a termina, y cu gobierno lo pone atencion riba e asuntonan mas importante, e drama aki a cuminza otro episodio. De repente nos ta haya nos cu un presidente di Staten cu ta anuncia di ta anula un mocion aproba den reunion di parlamento dia 15 di october, den cual a expresa desconfianza den e ministro menciona.
E asunto aki a bira un tema bastante grandi pa e forma cu e mocion a drenta reunion y mas ainda e forma con e propio presidente aki a maneha e situacion, ora cu fraccion opositor completo a bandona sala y edificio, sigui pa e representante di e partner mas chikito den coalicion. Por lo tanto no tabatin mayoria mas den e reunion y segun nos opinion e presidente mester a suspende e reunion, loke e no a haci.
Durante tur e tempo despues el a defende cu alma y cuerpo cu su decision pa continua e votacion tabata corecto. Asina nos a mira aparece tres formulario di votacion di Staten bunita asina cu 10 y den un caso 9 voto ariba. Pero awor e asunto ta tuma un otro rumbo pasobra e presidente ta haya necesario pa anula e mocion, sin cu e por duna un splicacion drechi pakico e mester haci esey. E por a djis laga e asunto asina; na cuanto pais no ta sucede cu un mocion no ta haya follow up y hopi biaha niun hende ta preocupa. Den e caso aki gobierno a cumpli cu deseo di parlamento y a manda un decreto (landsbesluit) pa Gobernador, cu a bira puntra pa opinion di Staten. A core tene reunion unda a tuma e decision cu ta informa Gobernador cu Staten ta bay di acuerdo. Seguidamente Gobernador tambe a firma…y e storia a caba, toch?
Aparentemente cu no. A keda hopi pregunta ainda, pero esey pa un gobierno cu ta custumbra bulldoze asunto no mester ta un problema? Aparentemente, e ta un problema. No ta asina facil pa haya sa ta kico a pasa cu a conduci na e paso straño aki, cu ademas no ta basa riba facultad cu e presidente tin pa haci tal cos. Pero ban trata e caminda cu e mocion aki a sigui cana. Si nos bolbe na e acontecimentonan di dos siman pasa, por corda cu e dia despues di e votacion den Staten, de repente Gobernador a manda yama presidente di Staten, al menos, nos ta kere esey promer cu nos kere cu e presidente a pidi audiencia y a hay’e asina liher tambe. Loke nos a tende cu lo tabatin un landsbesluit di retiro caba na despacho di Gobernador, y cu ta esey e alto autoridad lo a desea di discuti cu e presidente di Staten. Como cu tur cos cu ta pasa eyden ta keda eyden, no tin manera pa comproba esaki y nos no a haci e intento tampoco. Pero e audiencia ey ta keda algo straño, den e sentido cu normalmente Gobernador no ta bay reacciona asina liher riba algo cu a tuma lugar ni 24 ora promer, si e tin su reunion semanal cu Promer Ministro, unda e ta keda informa di algo asina. Pues algo mester a pasa cu Gobernador a manda yama e presidente. Naturalmente e presidente despues di sali di e despacho, no por bisa nada, pues esey ta keda asina.
Loke si ta un hecho duro ta cu den curso di e siman despues nada a sucede, te cu a sali e noticia cu gobierno a tuma e paso pa presenta un decreto na Gobernador pa retira e ministro, a base di e decision di conseho di ministro cu nan no kier traha mas cu e mandatario. Bon Dia Aruba a comenta cu e caminda ey tabata habri caba, pero pa algun motibo a scoge pa haci e asalto riba e ministro via parlamento. Finalmente, a logra cu colaboracion di Staten, pa haya un decreto firma pa Gobernador di retiro di e ministro.
Pero awor ta bin e parti sensitivo. E presidente, sin informa parlamento, a manda corespondencia pa conseho di ministro, y ta den un pleito awor cu e miembro independiente den parlamento, cu ta desea di sa ta kico tabata e mensahe cu e presidente tabatin pa conseho di ministro y e presidente ta buscando aparentemente un manera pa e no mester duna copia di e cartanan aki na e parlamentario. Kico tin den e cartanan ey cu ta asina delicado cu e miembro, y resto di Aruba, no mag haya sa?
Laga nos haci un ‘educated guess’. A informa conseho di ministro cu e ruta di usa e mocion di desconfianza como base pa e retiro di e ministro, no tabata factible mas y cu por lo tanto lo mester cana otro caminda. Si e carta ey, cu nos ta considera patrimonio publico, no sali, pasobra tanto e presidente, y su fraccion, y conseho di ministro ta haya cu e no mester sali, por cana e caminda legal pa haya esaki toch. Pero pa nos e no ta necesario, ta obvio cu e mocion no tabata usable. E presidente inepto no por a ‘deliver’. Esey ta un hecho.
