Presidente di STA, Diego de Cuba ta considera importante e topico di indexering. E ta ripara cu tin otro sindicatonan di e sector publico cu ta bringado pa indexering cu tur nan derecho, pero e tin cu bisa cu mester ta ‘hopi cauteloso’ cu esaki.
E sindicalista De Cuba ta haya cu si bo bay primi ariba e gobierno, bo por haya bo den un situacion, caminda un cantidad bastante formal di ambtenaar lo mester bay cas. Presidente di STA ta mira un situacion asina mas desastroso pa e pais.
“Mi ta kere cu esaki ta momento caminda bo tin cu hala faha mara,” el a bisa na Bon Dia Aruba.
E ta haya cu den un situacion asina, caminda un bloke sindical di e sector publico ta bringando pa indexering, bo tin cu yega claramente na acuerdonan cla y raspa, caminda den un futuro bo mester yega compensa esaki.
Otro opcion lo ta eventualmente tambe cambia full e sistema cu tin aworaki. Pasobra actualmente tin un varios beneficio of premie pa e ambtenaarnan, ademas di ATV dagnan. E sindicalista ta bisa cu kisas lo ta prudente pa distribui esaki den e salario di e empleadonan publico.
E partinan lo por wordo analisa pa yega na un solucion mas practico, pasobra nan ta maniobranan cu ta bay costa bo placa. “Kiermen e mester wordo studia bon prome,” e sindicalista a bisa.
Finalmente e sindicalista ta kere cu ‘Dios mediante y cu cabes friu, y perseverancia,’ e gobierno actual conhuntamente cu e gremio comercial y gremio sindical, mester por sali di e situacion aki.
