Presidente di sindicato STA, Diego de Cuba a reconoce cu e negociacion di e contracto colectivo (CAO) pa e trahadonan di Air Navigation Services Aruba (ANSA) no a bay facil. Te hasta tabatin basta discusion, pero esaki ta un refleho cu ‘democracia ta bibo’ na Aruba, segun e sindicalista.
Nan a logra firma un CAO nobo –segun De Cuba– ‘bon balansa’ cu gerencia di ANSA. Tur e ingredientenan necesario tabata aden pa STA consider’e como un bon CAO. El a tribi di bisa cu e ta un di e miho CAO actual na Aruba.
Adelanto
E trahadonan a conoce un adelanto hopi bon, den su concepto como sindicalista. “Si nos ta papia bruto, cada empleado a bay dilanti cu 500 florin pa luna,” el a declara. E ta kere cu un adelanto asina, tur empleado mester ta contento cune. Ya cu e CAO ta contene tur sorto di premie, igualmente vakantie uitkering, bonus, bashipremie, etc… “E ta contene tur cos… E tin delaster un ingrediente cu un CAO por contene!”, segun e sindicalista.
De Cuba a bisa cu e resultado tabata hopi positivo, caminda e compania por biba cune, y nan como sindicatonan y e trahadonan tambe por biba cune. Sinembargo De Cuba a cualifica esaki como un adelanto cu e ta haya dificil cu nan lo por conoce den un futuro CAO.
E ta haya cu den un proceso asina di beneficio bo ta yega na un limite tambe, cu bo tin di zorg pa mantene e compania bibo. E ta consciente cu teniendo na cuenta e gastonan di personal, no ta prudente pa den un proximo CAO sigui presiona pa bay mas halto.
P’esey nan a sostene varios reunion cu e trahadonan pa informa nan riba cual direccion nan ta bayendo. Mayoria di nan tabata di acuerdo y despues di varios luna di negociacion nan a yega na final di e capitulo aki.
E CAO di ANSA N.V. tin un duracion di tres aña, y e ta drenta na vigor cu forsa retroactivo for di 1 di januari 2019. El a felicita y gradici e gerencia di ANSA y tambe na e delegadonan di e trahadonan afilia na STA.
