Presidente di STA, Diego de Cuba ta haya cu Aruba ta mas cu 25 aña atras di locual mester ta e ley di ARBO (Arbeidsomstandigheden). E sindicalista ta considera cu e ta un ley hopi importante pa e clase trahado y tambe pa e dunado di trabou.
De Cuba ta kere cu locual minister di Labor a bin ta haciendo ta algo di aplaudi, pasobra un dialogo tripartite social-laboral ta canando. E ta bisa cu e ley di ARBO ta den estudio actualmente. E ta compronde cu a yega Raad van Advies (RvA) pa bay parlamento caba.
E ta spera cu na corto plaso RvA por duna su conseho ariba e ley di ARBO. Tambe e ta haya cu na su turno parlamento lo tin cu bay aproba e ley aki pa e drenta na vigor lo mas pronto posibel. “E ta un ley cu ta di suma importancia pa pais Aruba,” el a bisa.
E ley di ARBO ta hopi amplio, caminda ta poni specificamente kico por y kico no por riba tereno laboral. Y aparte di e ley di ARBO tin hopi mas leynan cu sindicatonan kier mira wordo cambia. Entre nan, esun referi na e cantidad di oranan cu e empleadonan ta traha pa siman. De Cuba a declara cu mayoria di e sindicatonan ta boga pa 40 ora pa siman, cinco dia pa siman y ocho ora pa dia.
E ta kere cu e ley riba orario di trabou ta e di dos punto di agenda ariba e dialogo tripartite Social Laboral, y e ta spera cu e dialogo aki por mantene e bida cu e tin actualmente. E ta haya cu tabata discusionnan habri y sincero di parti di tur gremio, comercial, sindical y di parti di gobierno tambe. “Mi ta bisa cu honestidad, ban sigui papia cla y ban trece solucionnan practico pa pais Aruba,” el a declara na Bon Dia Aruba.
