Presidente di Sindicato di Polis Aruba (SPA), Joselito Dirksz a declara na Bon Dia Aruba cu nan no ta pidi aplauso pasobra nan ta dilanti den e linea pa atende cu e situacion actual hunto cu otro trahadonan di sector salud.

Pero SPA ta haya cu Aruba ta un di e islanan, pa no bisa e unico na mundo, caminda polis no ta haya un aumento (toeslagen) y cu nan no ta mishi cu nan salario durante e crisis actual. Dirksz a declara cu niun luga di mundo, nan no a mishi cu salario di polis y tampoco cu salario di personal di enfermeria. “Anto dicon na Aruba si!,” el a lamenta.

Nan coleganan ta haya fastioso cu ta wordo propaganda den media cu polis no kier entrega. Presidente di SPA a bisa: “Esey no ta berdad. Nos tur ta den e crisis aki. Un boto e ta y nos tur ta den dje.” Pero nan ta contra di e manera cu e proceso di entrega a sucede, SPA ta haya cu no ta bon.

Nan sa cu no ta di awor, pero di hopi tempo, nan por sinti e presion di Hulanda cu ta keda enfatisa cu mester corta den payroll di land Aruba. Den esey -segun presidente di SPA- polis no por yuda. Nan a pasa henter un procedura masha exigente pa nan por bira polis.

Presidente di SPA a trece dilanti su propio ehempel. Dirksz a declara cu pa e por yega caminda e ta awor, a tuma 27 aña di su bida. Pero despues di un siman, el a bay atras financieramente. “Si mi bisa cu e cos ey no a dal mi, mi ta gaña,” el a declara.

E ta kere cu akinan ta e parti cu tin casi 600 polis cu e medida aki a dal nan. Nan ta sinti cu ta un medida fuerte, ya cu loke nan ta kere cu por haya memey di e situacion aki tabata un belasting heffing of un tipo di solidariteit belasting, gewoon riba payslip. Pero al contrario, gobierno a opta pa corta riba nan salario.

E ta haya cu si nan ta compara e situacion aki por ehempel cu sector hotelero. Un persona cu ta traha den hotel ta gana 3 mil florin pa luna, su salario ta keda mescos. Unico cu den tempo di crisis nan no ta trahando y tin cu ta aplica ‘no work no pay.’ Pero ora cu crisis pasa su salario ta keda mesun cos. Pero esey no ta e caso pa polis y pa ambtenaar. Nan literalmente a bay atras, y nan sa cu crisis ta bay pasa.

E tin entendi cu na luna di juli ya caba hotel ta cuminsa draai. Pues e chens ta grandi cu economicamente Aruba lo por recupera bek. Pero e ta haya tristo cu pa e ambtenaar chikito e medidanan no ta delimita sino ‘tot nadere orde,’ y cu nan por bay te añanan mas largo tambe. Pero di otro banda, SPA ta mira cu pa e minister- y parlamentarionan ‘cu supuestamente ta stima pueblo,’ e ta te 31 di december.