Ayera personal di departamento di Aduana tabatin un Santo Sacrificio di Misa na Misa Cristo Rey celebra pa pastoor Jairo y despues nan bay comparti y desayuna hunto na Centro di Bario Brasil. Pero tabata riparabel cu e celebracion aki no a conta cu e asistencia masivo di e personal di e cuerpo aki; y tampoco e no tabatin e entusiasmo di pasado.
Presidente di Sindicato di Aduana di Aruba (SADA), Eduard Maduro tambe a lamenta e echo aki y a haci un yamada pa nan coleganan mantene nan mes uni como un famia y un cuerpo; y no los for di otro pa diferencia cu lo por surgi riba tereno di trabou.E sindicalista a bisa cu su sentimento ta mixto cu e celebracion aki; ya cu el a haya un “tiki dolor” riba e asistencia pober na e ceremonia religioso aki. El a bay den pasado ora cu el a drenta den e departamento aki con uni nan tabata ta den e forma pa celebra nan dia internacional. E echo aki a pone reflexiona riba e 17 aña cu e ta miembro di e cuerpo uniforma aki y e pregunta ta: Unda nos ta bayendo aworaki? Y unda e cuerpo en general kier bay?
Sr. Maduro a bisa cu ora cu nan ta huramenta pa haci nan trabou y bisti nan uniforme, a pesar cu cosnan no mucho positivo den cuerpo por sosode, ta bon pa nan sigui y stimula otronan pa engrandece e cuerpo. “Mi no ta kere cu e cuerpo di Duana no ta solamente ley of parti di gobierno…. pero ta nos tur. Nos tur ta forma duana.”
E ta haya cu e parti di comunicacion ta hopi esencial, a pesar di diferencianan cu por existi. “Pero e diferencia ta cu papa Dios duna nos bida y salud pa nos bisti e uniform aki te ora cu nos baha cu pensioen, siendo cu gobierno ta transitorio.”
