Presidente di sindicato di Duana di Aruba (SADA), Edward Maduro a cualifica como un acto cu ta afecta integridad di e cuerpo; y tambe como hecho di falta di integridad cu ta afecta gobierno y Departamento di Recurso Humano (DRH), e nombramento di un colega den e posicion di Inspector, sin tin e curso rekeri pa e funcion aki.

E caso aki pa SADA ta uno hopi lamentabel, pasobra nos tin un gobierno cu ta papia di integridad y cu ta papia di bin cu un bureau di integridad, cu te dia di awe no a conoce luz di dia, segun e sindicalista. “Nos ta scucha tur dia propaganda na radio cu ta papia di integridad, pero esaki te aworaki no a concretisa,” el a bisa.

Esaki ta un punto cu e sindicalista a trece dilanti cu hopi preocupacion, ya cu e ta un caso cu nan a yega di informa aña pasa na maart, y cu ta ‘un nombramento cu a bay completamente robes.’ El a bisa cu pa un hende por aspira e funcion aki, mester como duanero un diploma academico, di cual e colega cu a keda nombra no tin. SADA ta lamenta cu DRH, cu mester ta esun yama den gobierno pa locual ta integridad, a faya barbaramente akinan. Pero no solamente e departamento aki, pero nan ta responsabilisa e director di cuerpo di Aduana, pasobra conhuntamente nan a percura pa e situacion aki a presenta.

El a aclaria cu no ta trata di e persona cu a haya e nombramento, pero e ta bay riba e hechonan di e forma con e nombramento aki a tuma luga. Maduro a bisa cu gobierno, cu tambe ta papia di integridad, a firma un decreto gubernamental unda nan a nombra un colega den e rango di inspector, sin tin e curso rekeri. E nombramento aki a wordo hala aden.

SADA por compronde cu e persona aki a bay corte pa defende su caso, locual e sindicato ta considera cu e ta den su derecho. A pesar cu e no tin e curso y no ta cumpli cu e rekisitonan pa locual ta trata e funcion di inspector di aduana, e caso a tuma luga 18 di november ultimo.

SADA a base di informacion cu a drenta cerca nan, a haya sa cu supuestamente DRH no tabata sa cu e caso aki tabata tuma luga dia 18 di november ultimo . “Locual pa nos ta di straña,” presidente di SADA a bisa.

SADA tabata presente durante e tratamento di e caso aki, y nan ta lamenta cu e defensa –na nan opinion– a laga di desea. Esaki compara cu otro casonan cu otro coleganan a yega di confronta, unda cu gobierno a bin ‘hopi miho prepara,’segun Maduro.

E ta remarca cu den e caso aki, tanto e director di duana como e directora di DRH a briya pa nan ausencia pa defende e ‘blunder’ cu nan a comete. SADA ta lamenta e hecho aki barbaramente, pasobra ta trata di un caso cu ta atacha integridad di persona cu supuestamente mester sa miho cu no por acepta un nombramento asina.