(EFE) – “Mi ta pidi señor minister di Interior pa nos coordina cu Ministerio di Defensa no solamente pa tin Polis, pasobra no tur cos ta responsabilidad di Polis. Nos ta bay saca Forsa Arma pa combati e delincuente chikito y grandi. Nos no por stop e di otro forma si nos no ta haci un tarea conhunto”, presidente Peruano, Pedro Castillo a declara.
Durante e presentacion di resultadonan di un mega operativo ehecuta na districto limeño di El Agustino, Castillo dialuna ultimo a sigura cu Polis Nacional “si tin e capacidad pa protege e seguridad ciudadano”, pero a insisti riba e necesidad di reforsa e lucha contra esaki cu recursonan di Forsa Arma.
E pronunciamento di e mandatario a sucede casi dos siman despues cu gobierno Peruano a declara estado di emergencia na Lima Metropolitano y provincia constitucional di el Callao.
E medida, cu lo ta na vigor pa 45 dia for di 2 di februari, ta implica cu Polis Nacional den tur momento ta mantene e control di orden interno, tambe por solicita apoyo di Forsa Arma, cu e obhetivo di detene e aumento di crimen y actonan ilicito den e regionnan aki di Peru.
Durante e mesun actividad na El Agustino, Castillo a declara cu lo pidi condena di bida largo pa su mes si keda demostra cu el a comete algun acto di corupcion durante su mandato.
Castillo a agrega cu ta existi “cierto gruponan” cu ta “kibra” democracia y ta compara su gestion cu otronan anterior.
Un sector di oposicion politico y di medionan local den ultimo dianan a pidi e renuncia di Castillo y tambe a anuncia proposicionnan legislativo di un mocion di destitucion y un acusacion constitucional pa purba kita e mandatario for di su funcion.
