Como un reunion hopi druk te hasta ofensivo contra su persona, asina presidente di parlamento Mervin Wyatt-Ras a clarifica e debate parlamentario riba e caso di minister di Labor Paul Croes.

Den e mesun reunion aki cu a tuma luga diamars ultimo a keda agrega un punto di agenda pa trata asunto di crimen organisa, mirando cu minister di Husticia Arthur Dowers tabata presente hunto cu minister president Mike Eman, e presidente ta splica.

Palabranan ofensivo
Di un banda presidente di parlamento ta lamenta cu e ta wordo tilda di “bobo y complice di corupcion” for di otro parlamentario femenino di oposicion. Sra. Wyatt-Ras ta considera su mes como un persona hopi respetuoso “aunke bo a ofende mi ta keda cu e mesun respet. Mi no a perde mi huicio!”. E ta considera su mes como un persona pro transparencia, pro integridad y pro democracia.
E ta haya cu e tabata un reunion hopi druk cu hopi gritamento specialmente di e damanan di e fraccion di MEP. “Mi a lamenta esey, pasobra mi ta bisa cu bo tin otro forma pa comunica”. E no ta descarta cu eventualmente tabata un strategia.

Punto di agenda
Un punto di discusion tabatin di haber cu e punto di agenda cu a keda agrega. Sra. Wyatt Ras ta bisa cu el a dicidi di agrega e punto di agenda tocante crimen organisa pa haci uzo eficiente di nan tempo, ya cu e minister di Husticia tabata presente. Ademas aworaki e miembronan di parlamento ta marchando den un direccion di campaña. Te hasta den ocasion cu e ta yama reunion tin diferente miembronan cu no ta atende nan. “Mi kier pa tur cos bay efectivo y cu tin un bon reunion.”

Tur dos punto a wordo trata hunto, ya cu mayoria den parlamento a pidi esaki. Aunke miembronan di oposicion a pidi pa trata nan separa buscado diferente argumento; pero nan no a logra. “Esey mi a haci, segun democracia di un pais y cumpliendo cu mi deber. Tambe como presidente di parlamento cu bo tin cu laga democracia tambe dicidi.”

Peticion di reunion
Tabatin diferente punto di ordo caminda oposicion no tabata kier mes pa e punto number dos no wordo trata. Segun presidente di Parlamento nan a uza diferente argumento cu e mes no ta compronde pa cu esey. E ta bisa cu ora un peticion drenta parlamento, e presidente di e organo legislativo aki tin tur autoridad pa yama reunion, pero e tin tur autoridad tambe con e ta yama reunion. “Tin peticion cu nunca no a honra den pasado.”

E ta bisa cu den su caso te ainda tur peticion pa reunion publico cu a bin cerca dje, el a cumpli cu nan. “Y bo mester cumpli den 30 dia pa bo yama e reunion y ma haci esey tambe”, e ta laga sa.

Tambe e ta haya cu mester tene cuenta cu tabatin diferente dianan liber for di 27 di april, mientras cu e peticion aki a drenta fin di maart. Pues e tabatin te fin di april pa yam’e, pero e dianan ey tabata dianan liber. P’esey el a haya cu e fecha di 2 di mei tabata ideal; ya cu ta e dia cu tur hende ta bin bek na trabou despues di varios dia liber. E ta lamenta cu e fraccion di oposicion di MEP no a mira su decision bon.

E ta conclui cu tur e criticanan cu e tabata haya den puntonan di ordo tabata manera “cierto excuus pa no trata e reunion”. El a añadi cu dado momento su impresion tabata cu nan a pone e reunion pa e por cumpli cu e peticion; pero oposicion mes no tabata kier pa e reunion tuma luga tampoco.