Presidente di Parlamento di Aruba, Sr. Juan ‘Ady’ Thijsen a referi riba e fenomeno politico di absentismo parlamentario. Pero tambe riba cierto critica haci contra dje riba tardansa di cierto reunion den nos organo legislativo.
Nan kier cambia e reglamento di ordo pa varios motibo. No solamente pa evita absentismo parlamentario, sino cu mundo politico a cambia. Mester compronde -segun Sr. Thijsen- cu mundialmente e politiconan di awendia ta den otro presion politico cu antes.
Un factor tin haci cu uzo di social media tin su influencia den politica ya cu ‘tur hende tin un cos di bisa bo,” el a declara. Pero tin biaha nan ta trece informacion no corecto y nan ta wordo camufla cu un nomber falso. Aunke tin biaha loke nan ta trece e berdad tambe.
E no kier haci uzo di e situacion aki como un excuss, pero como presidente di Staten, e por ripara cu e parlamentarionan tin biaha nan no ta bin reunion. E situacion aki ta motibo di critica den comunidad. Personalmente e ta considera cu tur parlamentario mester bin, ya sea cu tin reunion of no. Tin biaha cu nan ta convoca un reunion y nan no tin presente e 21 parlamentario riba e mesun liña. E ta kere cu a yega momento cu mester bin cu cambio contra absentismo parlamentario.
Igualmente e ta scucha cierto critica riba tardansa pa bin cu cierto reunion. Sr. Thijsen a referi cu berdaderamente nan mester cumpli cu e reglamento di ordo di Parlamento. E reglamento aki ta contene diferente punto cu ta specifica e funcion di cada un di nan. Entre otro esun di presidente di Parlamento su tareanan. Tambe con e proceso ta bay ora cu un ley ta wordo trata den sala.
Segun reglamento di ordo di e instituto, e ta esun responsabel pa bin cu e reunion cu ta wordo pidi pa e miembronan di e diferente fraccion. Sinembargo e ta admiti cu tin biaha e no ta resulta asina pa varios circunstancia. “Mi kier ta honesto semper,” el a bisa.
E ta haya cu den tur funcion bo mester ta semper transparente. E ta admiti cu niun di nos ta perfecto, ya cu den e trabou cu e ta eherce hopi cos ta cambia y hopi circunstancia ta wordo presenta tambe. Ta berdad cu e parlamentarionan tin derecho pa pidi reunion publico; y nan tin reunion den nan comisionnan. Tin un regla cu den 30 dia como presidente di Parlamento, e tin cu pone e reunion. Pero en practica ta yega di sosode cu e no ta asina. “Pero ami kier cumpli cu esey,” el a bisa na Bon Dia Aruba.
Un reunion cu a wordo cuestiona pasobra el a tarda hopi y cu Sr. Thijsen a referi na dje, ta esun cu a tuma luga no mucho tempo atras pa trata un mocion di desconfiansa contra minister Lampe. Thijsen a bisa cu fraccion di oposicion di AVP a pidi reunion publico aki varios biaha y como presidente di parlamento el a yega di pospon’e varios biaha.
P’esey e dia cu nan a bin cu e reunion aki el a dicidi di bisa publicamente y aclaria den sala pa kico e tardansa a tuma luga. Tambe el a pidi disculpa pa e tardansa debi cu den e reglamento di ordo ta poni 30 dia maximo, y e no a hacie. Ora cu Bon Dia Aruba referi na dje, el a contesta cu e mes ta acepta cu e no a cumpli cu e regla. E ta haya cu como presidente di un instituto importante manera parlamento ta, bo mester tin e grandesa pa bisa esey.
Sr. Thijsen ta haya cu como politico bo mester acepta tur critica. Pero e ta lamenta cu parlamentario Dowers a yega di publica den prensa cu e no ta digno di ta presidente di Staten. Ademas cu e no ta duna oposicion reunion, pero e ta faborece si e otro fraccionnan cu ta den coalicion. Presidente di Staten a cuestiona cu e critica aki a bin di un parlamentario cu masha poco ta bin atende reunion di Parlamento.
