Recientemente riba su pagina di Facebook, presidente di Parlamento, Raymond Kamperveen (Raiz) a informa cu ya caba ta preparando pa yama reunion publico, encuentro publico y otro reunionnan di comision.
El a indica cu tin algun reunion publico pa yama cu desde 2022 no a yama. Lo yama e reunionnan basa riba e fecha cu a pidi nan. Esey kiermen cu lo yama esnan mas bieu prome. Ademas, Kamperveen a indica cu ta bay publica e fechanan den tur transparencia ora e agenda ta completa.
