Despues di fungi pa 4 aña como parlamentario, Guillfred Besaril ta asumi un reto nobo como presidente di e organo legislativo aki. Pero mirando cu ainda ta tumando luga e trabou di formacion di un gobierno nobo di coalicion, eventualmente e no lo permanece den e funcion aki pa largo hunto cu e vice-presidente di parlamento, Andin Bikker. Sinembargo e ta un responsabilidad cu nan ta carg’e hunto, ya cu no ta un one man show tin, segun sr. Besaril.
E no ta descarta cu ora cu gobierno keda formal lo tin cambionan nobo den e mesun parlamento. Actualmente nan ta den un fase transitorio y politico cu e formado di gobierno ta realisando cu e otro partnernan di coalicion. Nan ta basta leu caba pa loke ta e programa nacional di gobernacion. Pero e siguiente step lo ta defini e forma con nan ta bay carga e plan di gobernacion aki. E ta referi concretamente na e ministerionan y kendenan lo bay carga e responsabilidad aki.
Den cuadro di esey nan ta den un fase transitorio ya cu sigur ta bin cambio den e cuerpo di parlamentario actual, alo menos den e fraccionnan cu ta carga e coalicion di e gobierno nobo. “Esaki tambe por nifica cu mañan Guillfred Besaril ta carga completamente un otro funcion den un futuro gobernacion”, el a bisa.
Privilegio y control
Sinembargo e presidente nobo di parlamento a laga sa den linea nan grandi cual ta e maneho cu e kier desplega den e posicion aki. Den su prome reunion y conferencia di prensa den e constelacion nobo den parlamento, el a bisa cu esaki ta e parlamento number 10 cu a wordo instala durante nos historia di pais Aruba. E ta haya su mes privilegia di ta un di e 21 miembronan di parlamento cu a wordo eligi for di un comunidad di 120 mil habitante. “Bo por imagina ki privilegio e ta pa awe bo ta e presidente di un grupo bastante chikito”, el a bisa.
El a declara cu mas leu di e parti prestigioso, nan tin e tarea primordial di controla y guia pa e pais aki tin un gobernacion mas miho cu sea posibel. Sr. Besaril ta kere cu e reto di mas grandi ta esun di duna contenido na e resultado di eleccion. Segun su analisis e resultado di eleccion ta expresa e grito di pueblo pa bin cu mas control.
“Un control cu durante e ultimo añanan no tabata optimal”, el a bisa. E ta kere cu como politico nan mester duna oido na e yamada aki di pueblo pa eherce un control mas stricto. Pues presidente di parlamento ta kere cu den e fase transitorio aki nan tin cu traha e fundeshi pa ora cu mañan ora cu tin un parlamento den su constelacion formal pa e proximo 4 aña, nan por eherce miho trabou di control, reestableciendo ordo y respet necesario.
E ta kere cu e fase transitorio aki lo ta uno di corto duracion pero si uno suficiente pa sinti y mira di biaha e diferencia, ora cu e ta papia di reestablece ordo den nos comunidad, pero specialmente ordo den parlamento.
