Diamars ultimo a tuma un luga e reunion den parlamento cu fraccion di AVP a pidi riba maneho di minister di Educacion, Ciencia y Desaroyo Sostenibel, Armando ‘Rudy’ Lampe, y tambe presenta un mocion di desconfiansa contra e mandatario.

Presidente di e organo legislativo, Juan (Ady) Thijsen, a bisa cu e reunion aki a wordo pidi varios biaha caba. El a admiti cu como presidente di parlamento, el a tarda pa bin cu e reunion ey. Pero den cuadro di democracia, e ta un reunion cu fraccion di AVP a pidi y finalmente esaki a tuma luga diamars.

Tambe tin mas reunion cu a wordo pidi di otro fraccionnan. Pero e kier trece claridad pa ‘no tin mal interpretacion cu e reunion aki a wordo poni caba dia 15 di mei, riba un dia liber’. E tabata un reunion di comision fiho. “Mi ta ripiti. E reunion aki ta di AVP cu a pidi’e,” el a bisa. Y el a agrega cu ‘nan ta bruha cos den otro’.

Encuanto e otro reunion pendiente, presidente di Parlamento a indica cu nan lo yega na nan turno. Cada un di e peticion haci e lo atende den un periodo di 30 dia – segun reglanan di parlamento- pa e por cumpli cu e reunion cu nan ta pidi.

Den cuadro di e reunion aki, presidente di parlamento bisa cu e kier duna e minister na turno e oportunidad pa duna su presentacion y responsabilisa su maneho. Pero tambe espacio pa e parlamentarionan trece nan potencianan y bin cu preguntanan.

Minister Lampe.
Lampe a haci uzo di e obra ‘Cronica de una Muerte Anunciada’ di Gabriel Garcia Marquez pa argumenta e intencion cu e fraccion di oposicion a pidi e reunion aki. “Esaki ta manera loke mi a biba como minister di enseñansa: Cronica de una muerte politica anunciada,” el a bisa.

El a bisa cu no a transcuri ni dos luna despues cu e tabata minister, cu e partido di oposicion (AVP) a uza su makinaria politico pa bay riba dje, ya cu e ta parti mas debil di e coalicion di gobierno.

Mirando cu e tin un asiento, nan ta purba di tumb’e como minister di Enseñansa, pa asina kibra gabinete Wever-Croes, el a bisa. Niun dos luna despues -el a declara- cu e fraccion di AVP a presenta un mocion pa para tur decision di minister di Onderwijs. “Nan a bin cu e mocion ey a sabienda cu ya e tabata e anuncio di un morto politico,” el a bisa.

Lampe a bisa cu den e reunion di diaranson ultimo e fraccion di oposicion kier a ehecuta su morto politico. E ta haya cu esaki tabata e obhetivo cu nan a pidi e reunion aki. No pa informa pueblo riba situacion den educacion, ‘sino cu nan a bin pa ehecuta e sentencia di e morto politico anuncia door di presenta un mocion di desconfiansa’.