Un punto den e discusion cu gobierno di Reino (Hulanda) cu Aruba tin di haci cu e social crisis plan. E posicion di Hulanda ta cu gobierno di Aruba mester ahusta su mes na loke a keda stipula riba gasto di personal den cuadro di e normanan cu a keda firma den e protocol firma aña pasa.

Pa Presidente di Parlamento, Juan (Ady) Thijsen, no tin motibo di parti di conseho di gobierno di Reino pa cuestiona esaki. E ta argumenta esaki huridicamente a base di e protocol firma, pero tambe riba Status di Reino y autoridad cu Parlamento di Aruba tin como representante di pueblo.

Thijsen a declara cu e organo legislativo a duna na e minister di Asunto Social e sosten pa bin cu e social crisis plan, ya cu e problema cu e gobierno actual a hereda no tabata uno financiero so, sino social tambe. E ta haya cu tabata necesario atende cu e crisis social aki, ya cu ta algo iresponsabel si nada ta wordo haci den nos comunidad.

Protocol su balor.
Encuanto e protocol firma, como hurista, el a bisa cu un protocol den e contexto huridico no tin e balor cu un ‘rijkswet’ of ley di Reino, cu ta un decreto halto den statuut di Reino, tin. Mientras cu un protocol ta practicamente ta un acuerdo entre dos parti, y e no tin peso den e contexto cu nos ta den Reino.

Ademas e ta señala cu no ta berdad cu gobierno a firma y nan no ta cumpli. Pero tambe -segun presidente di Parlamento- e protocol no tin e base huridico pa hink’e den un ley, cu ta otro punto den e discusion cu pais Aruba tin cu Hulanda. “Nos a kita e base huridico legalmente y legitimamente,” el a declara. Nan a dicidi di kit’e via amienda. Pero no ta su intencion pa bay den polemica riba e asunto aki, ya cu e ta respeta Hulanda su posicion y/of opinion.

Como presidente d e organo legislativo e kier si cu gobierno di Aruba cu Hulanda por yega na un punto pa solucion di nos pais. Y no perhudica un pais cu menasa cada rato di bin cu un

‘aanwijzing’ (instruccion). Segun Thijsen, Hulanda no tin base pa ‘aanwijzing’, ya cu gobierno ta bin atendiendo cu e retonan financiero di un forma responsabel, y te hasta pais Aruba ta bay haya surplus den su presupuesto 2020. “Kiermen nan no tin argumento,” el a bisa. Sinembargo pa atende e diferencia cu ta existi entre Aruba y Hulanda, e ta kere cu ambos parti mester duna di nan banda.

Social crisis plan.
Segun Thijsen no ta cuestion cu e ta defende su partido politico, sino cu den e debate cu nan tabatin riba e social crisis plan, ta derecho di Parlamento pa crea un fondo pa atende cu e problema social di nos pais.

E ta agrega cu esaki no ta e prome fondo cu a wordo crea, sino cu tin mas fondo cu a crea den pasado. Como representante di pueblo di Aruba -el a bisa- parlamento tin e facultad of poder di determina cuanto nan por dispone pa crea un fondo. “No tin niun hende cu por bisa nos, no. Conseho di Reino no por bisa nos no…,” el a bisa.

Encuanto e posicion di Hulanda expresa tambe pa e colegio di supervision financiero CAft, cu e social crisis plan mester wordo hinca den e 479 miyon acorda den e protocol, presidente di parlamento a bisa cu esaki no ta berdad. E no ta haya esaki bon ni corecto, y e ta lamenta cu tin hende cu ta bay tras di nan pensamento. El a insisti cu den e protocol no a palabra esaki, y como hurista, e ta considera cu Hulanda no tin rason.