Parlamento di Aruba, como nos maximo organo democratico,, ta bira un instituto esencial pa nos pais por sigui draai den e momento di crisis actual cu coronavirus/Covid-19 tin su consecuencia pa nos comunidad.

Y esaki a keda demostra den e ultimo dianan aki, caminda diabierna siman pasa nan a trata y aproba presupuesto 2020, cu un nota di cambio cu ta inclui un plan di emergencia di 1.3 biyon florin pa atende cu e situacion economico/financiero actual.

Igualmente nan a ricibi pa wordo trata e proyecto di ley pa regla e asunto pendiente cu Citgo. Ta trata di un machtigingsverordening pa asina cera e convenio entre gobierno y e consorcio Citgo.

Pa medio di e convenio aki, pais Aruba ta cede Citgo 150 miyon dollar di acreencia di e clausula di incumplimento di e contact orginal, unda e suma original tabata 300 miyon dollar. E parlamentarionan a haya te awe pa presenta nan preguntanan.

Ayera presidente di Parlamento, Juan ‘Ady’ Thijsen a declara na Bon Dia Aruba cu nan ta sigui operando manera nan a haci siman pasa. Nan por haci’e manera normal, pero nan mester tene nan mes na e regla di distanciamento social. “E pais tin cu sigui draai,” el a bisa.

Reunion

E ta haya cu den e circunstancia actual nos tin cu tene cuenta cu nos mester keda leu for di otro pa asina cuida otro y cuida bo mes. Nan a pasa e presupuesto di un manera cu tur parlamentario tabat’ey hunto cu nan respectivo fraccion den e edificio atendiendo e reunion, pero si nan no a bay den sala.

Pero e ta haya esencial cu mester tin e cooperacion di tur hende pa haci e reunion di un manera normal, pero teniendo cuenta cu e distancia. Ya cu tin asuntonan cu nan mester atende, entre nan e proyecto di ley pa regla e asunto pendiente cu Citgo, ya cu e pais mester sigui draai.

Mescos cu nan a haci cu e presupuesto, ya cu tabatin mester cu e por keda cla pa asina gobierno por funciona, y tambe pa gobierno por wak unda por haya yudansa y fiansa den mercado internacional.

Impacto

Igualmente mester atende cu tur e hendenan cu ta perdiendo trabou y e companianan chikito y mediano cu ta cerando, mester yuda nan den e periodo di crisis aki. Sinembargo salud y bida di hende tin prioridad, despues nos ta deal cu situacion economico. “No ta cu nos ta para keto. Pero ya caba nos tin ideanan con nos ta bay haci,” el a bisa.

Presidente di Parlamento a bisa cu nos ta pasando den momento hopi dificil, no Aruba so sino mundo henter. Nos tin cu bay wak con nos tin cu solucion’e. Ya cu e Covid-19 no solamente tin un impacto riba salud di hende, pero e tin un impacto den tur area, economico, social, financiero, laboral, etc… Pero lo mas pio ta cu e tin un impacto riba bida di hende, el a bisa.

El a elogia e trabou cu Minister Presidente, Evelyn Wever-Croes hunto cu su gabinete ta bin haciendo. Un frase cu e ta considera importante ta esun caminda e prome mandatario ta referi cu si bo ta stima bo mes, si bo ta stima bo famia y si bo ta stima bo pais, anto bo ta keda bo cas y bo ta haci loke e reglanan ta duna bo di haci. Pues den e situacion actual, nos mester ta disciplina, ya cu esaki ta e forma con nos por yega na otro y asina nos ta hiba nos pais dilanti. E ta haya cu hunto nos ta bay soluciona e problema aki.

 

Nos tur por wak con Aruba a wordo impacta y ya caba nos por wak e consecuencia di e coronavirus. “El a dal nos duro,” el a expresa. El a sigui bisa cu e unico manera cu nos por resolve y purba di soluciona e situacion aki ta door di tin union. Den e caso aki, nos mester laga nos diferencia un banda.

P’esey el a haci un yamado na tur fraccion y miembro di nos organo legislativo. Como presidente di parlamento e ta pidi tur fraccion cu awor no ta momento pa hunga politica. “Awor no ta momento pa bay hunga populista,” el a declara. Tampoco e ta haya cu tin espacio pa egoismo y individualismo pa wak cuanto voto bo ta bay haya promoviendo bo mes politicamente y haciendo uzo di social media. E ta haya cu esaki ta un actitud eroneo.

El a manda un palabra di elogio na tur trahado di salubridad publico y tambe esunnan cu ta traha riba tereno di husticia, entre nan polis, cu ta trahando pa purba di yuda nos comunidad, coriendo risico cu nan bida mes. “Esey ta demostra tambe cu nos por soluciona e situacion aki,” segun Sr. Thijsen. Presidente di Parlamento a pidi tur hende di Aruba pa purba reflexiona. Ta importante pa keda bo cas, yuda unda bo por yuda, y pidi proteccion di Señor.