Raymond Kamperveen ken awor ta fungi como presidente di Parlamento di Aruba, den un entrevista pa Bon Dia Aruba a trece dilanti diferente informacion, como por ehemplo, e reunionnan mas importante cu tin planea di haci prome cu siguiente parlamento lo huramenta dia 8 di januari.

Pa esaki, Kamperveen a sigura cu ora el a yega na e funcion aki na cuminsamento di september el a topa cu hopi diferente reunion for di aña 2001 cu no a ser yama,unda e mester a pasa den tur di nan y a scoge pa manda un e-mail na cada lider di fraccion pa asina ey duna nan e oportunidad pa puntra nan si nan ta di acuerdo pa cierto reunionnan.

No tur lider di fraccion a contesta mesora, manera el a sigura. Sinembargo, tin reunion cu lo por cuminsa tuma luga for di 15 di october, na unda a mira relevante pa trece na parlamento un reunion tocante loke a sucede cu Stichting Sportsubsidie Aruba (SSA) cu minister di Deporte y Enseñansa Endy Croes.

“Un reunion cu ta hopi na su luga aworaki, e ta un tema cu ta recien y ta importante pa nos scucha for di minister Croes kico a bay robes, mi no sa si e por bin tambe cu e voorzitter di SSA pa tambe por contesta preguntanan, pa tin mas claridad riba e situacion. No solamente pa nos como parlamento sino tambe pa pueblo haya sa kico a sucede,” el a bisa.

E di dos lo a bira un reunion publico cu prome minister Evelyn Wever-Croes pa duna un aclaracion riba loke el a firma ultimo pa por a yega na e 5.9% di refinanciamento di prestamo pa pandemia di Covid.

Despues di esey, lo tin den schedule un reunion publico pa loke ta trata e investigacion denomina Portulaca miranco cu autoridadnan hudicial a drenta den Besturkantoor y nan kier mas informacion tocante e caso aki, aunke e ta den proceso y bao encargo di Ministerio Publico.

Den mesun reunion aki, a invita minister di Integridad, Ursell Arends, pa duna su punto di bista como minister di Integridad y kico el a haci pa cambia e sistema di gobernacion na momento di escoge un hende pa traha den gobierno.

Ademas, di esaki tin un peticion di reunion publico dirigi na prome minister Evelyn Wever-Croes pa metemento politico den Ministerio Publico pa cierto casonan segun loke algun parlamentarionan di oposicion ta considera.

Oficialmente no tin un peticion pa un reunion publico pa loke ta trata e tema di Eagle LNG pero si ta den e plan di reunion publico como un tema relevante.

Fraccion di AVP a manda yama un reunion publico cu minister di Transporte Ursell Arends pa loke ta trata e situacion di permiso di taxistanan.

“E intencion ta pa tur siman, diamars y diahuebs tin sesionnan den parlamento pa trata tur e puntonan ey,” el a sigura.

Fraccion di MAS, Accion21 tambe a pidi un reunion publico cu minister di Enseñansa, Endy Croes pa trata e uitspraak di SKOA cu ta relaciona cu e werksternan.

Awor cu Kamperveen a bira presidente di Parlamento di Aruba su persona tin diferente reunion cu instancianan y organisacionnan pero su preocupacion di mas grandi ora el a haya e funcion aki tabata pa por yama tur e reunion menciona caba cu ta considera como temanan importante pa por informa comunidad.

“Unico cos ta cu mester cera quorum y den esaki e wega politico ta wordo hunga, dus tur 21 parlamentario mester t’ey den reunionnan no solamente 11, pa nos por discuti. Esnan cu ta di partido MEP, por ta nan ta bin pero nan no ta cera quorum. Mi trabou ta pa yama nan y constata, si nan no bin, mester wanta e reunion tot nader order pero e ta bay bisa mas di nan cu di nos,” el a señala.

Un otro meta cu Kamperveen tin na e momentonan aki ta cu e kier cambia e narrativa den parlamento na momento di trata temanan cu ta toca tanto gobierno como oposicion, “e intencion ta pa asina cu nan ta desvia papiando di otro tema of tira palabra pa otro mi no ta bay acepta esey. Parlamentarionan tin cierto cantidad di minuutnan pa papia y ministernan tin mas tempo, pero nan ta den Cas di Pueblo y nan mester keda cu respet pa otro y den e tema.”

Den ultimo tres aña trahando como parlamentario e ta mira cu traha conhuntamente cu coalicion ta algo bon, pa motibo cu di e forma ey internamente nan ta controla otro, “ideal ta pa bo tin un balans, pero na momento cu tin dos asiento so y bo tin 8 minister den conseho di minister por ehemplo, 6 ta bay na fabor di nan mes. Si bo a scoge pa traha hunto, bo tin cu traha na bienestar di Aruba,” el a bisa.

E parti negativo di un coalicion manera el a sigura ta cu si tin 4 of 5 partido, e ta bira dificil pa motibo cu e oportunidad pa un gobierno cay ta hopi mas.

Pa loke ta trata e caida di gobierno, na unda algun parlamentario ta culpa cu tabata debi na “inmadurez” di otro of ta trece dilanti cu tabata pa via di matrimonio di mesun sexo, Kamperveen a bisa cu “gobierno a cay pa motibo cu MEP no ta contento cu no tin control den parlamento mas. Ora bo tin un presidente cu ta abstene pa yama cierto reunionnan cu ta di importancia, no solamente pa parlamento sino pa claridad pa pueblo, ta cambia reunionnan publico pa un otro reunion cu ta dura menos y por haci un par di pregunta so y no por haci ni mocion di desconfiansa ni haci amienda,” el a señala.

Tocante e ley di matrimonio di mesun sexo, ley mester a sigui su proceso pero e realidad ta cu nan rek te cu casi seis luna “nan a usa tur triki den buki pa purba no yega eynan, ora a yega eynan, nan a palabra pa wanta e ley 10-10.”

Pa e motibonan ey y otronan mas, nan no tabatin mas confiansa den anterior presidente di parlamento y a pidi pone un otro hende pa nan por yega na un bienestar di Aruba, “pero mi por imagina, si nan ta haci’e nan humiya nan mesun candidato, nan a pensa nan strategia, despues nan a scoge a mi como presidente y por a wak e accion pa bay gobernador, dus e tabata full plania caba,” el a comenta.

E mesun mainta ey, segun e ta conta tabatin conseho di minister unda e dos minister di Raiz no a wordo invita.

“E motibo mas grandi no tabata e ley, sino e manera con nan haci’e pa evita. Riba dje parlamentario Marco Berlis ta saca un campaña cu e ta bin cu un referendum pa e ley. Con un referendum ta bay kita un uitspraak di un hues? E intencion di e campaña aki ta pa kita e ley pero nan no por haci’e pa aworaki.” Kamperveen a expresa.

Manera ta conoci, eleccion ta dia 6 di december y di esaki el a sigura cu aworaki e tin mas experiencia y un miho bista con parlamento ta traha y e lo subi lista como candidato di partido Raiz debi cu ainda tin puntonan cu mester mehora y mester atende cune.