Presidente di Parlamento di Aruba, Juan Ady Thijsen: “Aña 2021 lo bay ta hopi crucial y determinante pa Aruba”

Diamars atardi, presidente di Parlamento di Aruba, Juan Ady Thijsen a ofrece un conferencia di prensa pa duna un relato di desaroyonan cu aña 2020 tabatin pa e organo legislativo aki.

Manera Thijsen a sigura, nan a cuminsa e aña aki cu hopi positivismo pa motibo cu nan a sali pa trata un presupuesto pa Aruba cu un surplus di 46 miyon florin, y nan sa cu esey a pusha nan unda cu e finanzas, economia y parti social mester a cuminsa drecha. Pero igualmente nan tabata hopi positivo.

Ora Covid-19 a haci su introduccion na Aruba, manera tur hende sa, esey tabatin masha consecuencia grave pa e pais. No tabata solamente pa consecuencianan financiero, economico y social, sino specialmente pa e parti di salubridad, segun Thijsen a sigura.

Esaki a causa cu parlamento tambe mester haci nan reunionnan di otro manera, y el a señala cu nan a cumpli cu casi tur reunion di comision permanente, comision central y tambe reunion publico.

Den mesun linea, el a splica cu nan a keda sin trata e presupuesto di aña 2021 cu no a wordo entrega ainda door di circunstancianan, pero cu tampoco nan a logra keda cla cu e independisacion loke nan ta yama Hoge Colleges van Staat y Comision Swaen. Den esey nan ta purba di fortifica e estado di derecho cu ta biba aden y cu Thijsen a sigura cu “lamentablemente nan no a keda cla,” pero nan tin e proposicion pa finalisa proximo aña.

E motibo di pakico e ta menciona esaki, segun Thijsen, ta cu parlamento a wordo independisa y ta hopi importante hunto cu Algemene Rekenkamer, hunto cu Raad van Advies y tambe defensor di pueblo. El a afirma cu a bin preguntanan cu Aruba ta e unico cu no tin defensor di pueblo (Ombudsman).

Di esaki, el a expresa cu a bin un retraso pa motibo cu na 2017 e ley di defensor di pueblo tabata casi cla pa wordo trata, pero nan a scoge den cuadro di fortificacion di derecho pa lanta e Comision Swaen y den esey nan tabata kier pa tur cos wordo trata di un manera paralelo cu otro pa asina por keda cla.

Den tres aña, nan a keda cla cu e ley di defensor di pueblo y nan ta espera cu pa 2021 precisamente na luna di juni e defensor di pueblo t’ey pa por cuminsa traha di biaha, pa wak ken ta bay traha cune, cu tambe ta importante.

Pa Thijsen, aña 2021 lo bay ta hopi crucial y determinante pa Aruba, unda cu gobierno y parlamento tambe tin su rol. E lo ta un aña di eleccion, ademas cu e pandemia ainda t’ey y nos tin cu siña biba cune pa asina tuma decisionnan. Manera a pasa e aña aki ora Covid-19 a yega nan a cuminsa cu e negociacionnan cu gobierno di Hulanda.

“Gobierno di Aruba a cera un compromiso politico cu Gobierno di Hulanda”, Thijsen a expresa.

Pa loke ta trata e dos rijkswetten, awor a proceso a cuminsa, manera Thijsen a afirma, cu a entrega nan concepto na Raad van Staten na Hulanda pa ricibi conseho. El a sigura cu nan no sa si nan ta bin cu cambio, esey ta depende di e conseho.

“Anos ta prepara. Ora cu nan ta mand’e pa nos hunto cu Corsou y Sint Maarten, e ora ey nos por trah’e akinan manera un rapport pa despues bay Hulanda”, el a bisa.

Tambe el a trece dilanti cu ora trata esaki den Tweede Kamer, nan ta bay ta presente cu un delegacion di parlamento manera nan tabata haci semper.

Ademas, el a menciona cu nan como parlamento ta esun cu ta tuma e ultimo decision y esey pa nan ta hopi importante. “Nos ta sostene nos gobierno, nos ta haya cu nan a tuma un bon decision, pasobra den e pais aki semper tin cu corda riba bo pueblo y su sobrevivencia”.

Pa dia 7 di januari na parlamento lo cuminsa cu e reunion interparlamentario (IPKO) di manera virtual cu nan tin cu tur e parlamento di reino pa papia riba diferente topico, entre nan e rijkswet, pa asina indica caba riba nivel di parlamento con nan ta wak e asunto.

Otro asunto cu tambe ta bay ta hopi importante, segun Thijsen a señala, ta cu nan lo sigui trata loke ta abuso di mucha. Pa esaki, el a menciona cu akinan ta trata di hopi instituto no solamente parlamento. “Parti di departamento ta hunga un rol, gobierno ta hunga un rol, pero huesnan y Ministerio Publico ta hunga un rol tambe den estado di derecho cu nos ta biba akinan”, Thijsen a bisa.

Asina mes, el a comenta cu nan kier un solucion pa e problematica aki cu ta hopi grandi pa tur cu ta biba akinan y nan kier un solucion pa e aña cu ta bin.

Di presupuesto 2021, el a indica cu ta bay wak con ta bay trata esaki pa keda cla cune pa asina por sigui riba e parti financiero, economico y social.

Di loke ta trata e topico di refineria, Thijsen a señala cu nan ta apoya e Letter of Intent cu a wordo firma, pa motibo cu nan ta kere cu mester bin cu otro pilar economico pa drecha e parti di economia di Aruba. “Loke ta importante ta cu e pais aki lo lanta back, su economia mester wordo lanta y mester crea cupo di trabao”, el a bisa.

Di otro banda, el a trece dilanti cu den pandemia di Covid-19 aki cu tin cierto hende cu ta iresponsabel y cu ta mustra cu balor di bida di hende no ta importante. “Mi ta kere cu tur hende mester reflexiona un rato”, Thijsen a finalisa.