Presidente di Parlamento Ady Thijzen a duna di conoce un reporte di aña 2019 cual ta trata e leynan trata den Parlamento y desafionan cu aña 2019 a trece cune.

El a enfoca riba dos punto importante, pa loke ta trata Aruba mes y e posicion cu nan tin den reino Hulandes pa motibo cu tin decisionnan cu ta wordo tuma na Den Haag y cu ta afecta Aruba directamente y nan tin un rol den esey.

Di mesun manera, el a expresa cu nan a bay tres biaha pa Hulanda un di nan tabata pa trata den un instancia cu ora paisnan tin disputa cu otro riba un articulo di statuut, unda tin un instancia cu ta obhetivo y ta independiente por duna un veredicto di ken tin rason.

Aworaki e situacion no ta asina, Thijzen a splica cu nan ta haya hopi problema pa manera con e sistema ta, Hulanda como pais den reino ta tuma decision y e mes ta eherce esaki, si tin un disputa e mes ta bay dicidi ken tin rason y cu e situacion no por sigui asina, el a declara.

Thijzen a bisa cu nan a pasa hopi leynan cu nan a aproba pero tambe tin biaha cu tabatin leynan cu nan a cuminsa traha riba nan.

E ley di notario ta un, pa motibo cu tin hopi trabou na Aruba di tereno y herencia, pa via di esaki mester di notario pa e cosnan bay mas lihe.

Tambe el a menciona un e ley cu ta trata di malesanan hopi peligroso, esaki ta regla cierto cosnan importante pa salubridad publico, tambe ta existi un cu ta trata di reforma fiscal, labamento di placa y terorismo.

Tocante e ley Landsverordening Aruba Financieel Toezicht (Laft) cu a trece hopi polemica, el a señala cu nan a haci un cambio grandi, nan a tuma e decision pa para pa loke nan ta kere den dje y nan ta kere cu un ley no por ta contra constitucion, ‘Parlamento a tuma su responsabilidad, e ta controla Gobierno y e tin cu haci cambionan pa mustra cu Aruba ta biba den un estado di derecho’, el a sigura.

E ley di Laft ta hunga un rol hopi grandi segun Thijzen a comenta, pa motibo cu Caft cu ta parti di dje ta duna cierto consehonan, pero nan no tin pia pa para riba dje pasobra e ley no ta duna esey manera cu nan ta pensa, el a informa cu nan a kita autoridad di conseho di reino, pero nan a laga Caft como conseho, asina mes Hulanda no a acepta esaki.

Di loke ta trata 2019, el a expresa cu Parlamento a asumi un responsabilidad hopi grandi, sin conta cu a wordo entrega varios ley di iniciativa di loke ta trata screening di minister cu tambe lo conta pa parlamentario y tambe nan a entrega loke nan ta yama financiamento di partidonan politico, ademas el a trece dilanti cu nan a cuminsa trata e ley di Ombudsman.

El a splica cu nan ta den un proceso pa independisa institutonan manera Raad van Advies of Algemene Rekenkamer cu mester ta independisa ainda mas, nan mester ta leu di Gobierno pa tin control manera mester ta specialmente e parti di finansa y parti huridico.

Un di e retonan cu ta caracterisa e aña 2019 pa pais Aruba, Thijzen a bisa cu tabata e situacion cu Venezuela, tocante esaki el a sigura cu nan a bay te Bruselas pa motibo cu esaki tin efecto riba e presupuesto, situacion financiero, economico y social.

‘Paisnan grandi manera Colombia tambe tin efecto riba e migracion Venezolano’, Thijsen a menciona. Ademas, esaki a trece como consecuencia cu Aruba a crece den poblacion 10% mas, loke ta nifica cu e impacto ta grandi.

Tocante ley di Serlimar, el a manifesta cu esey ta den proceso y cu nan no a bin bek cune e aña aki pa motibo cu nan a duna espacio, ‘bo tin cu tene na cuenta tur actornan pa sinti cu tabatin cierto diferencia den opinion y esey ta sano den democracia’ segun e mes a destaca.

Pa finalisa, Thijzen a trece dilanti cu un di e retonan mas importante di su funcion como presidente di Parlamento ta ora cu e tin cu dirigi e reunionnan no solamente den sala, tambe ora e personanan ta hiba un peticion of manifiesto pa Parlamento e tin cu papia cu e hende y asumi e rol pa scucha tur hende, un presidente di Parlamento ta asina importante pa con e ta anda y con e ta procesa e democracia.