Ministerio Publico awor mester investiga si Presidente di Parlamento mr. Juan Ady Thijsen a haci entrega di acusacion falso. Minister Marisol Lopez Tromp ayera a entrega keho di acusacion falso contra Sr. Thijsen unda e ta exigi rectificacion, mientras cu tambe el a entrega cartanan na gobernador pa bolbe ilustra kico a sosode den Parlamento dia 15 di October ultimo. Pero kisas mas yamativo ta cu Marisol Lopez Tromp a haci un yamada publico na Prome Minister Evelyn Wever Croes pa “fast track e mocion di desconfianza den un ley pa gobernador por firma, pa asina comunidad por haya claridad. Pasobra ya ta un siman cu a vota pa e mocion di desconfianza.”

Ayera e Minister, kende a bisa di ta trahando normal, a bolbe pa un audiencia cerca gobernador Alfonso Boekhoudt. Despues di su encuentro, e Minister a duna un declaracion amplio cu a toca e tema di e mocion su contra, e keho di Presidente di Parlamento contra su persona, e declaracion cu a haci riba e supuesto sentencia contra su persona y tambe e rumornan cu e lo ta mete den DIP, pa nombra persona y reparti tereno.

Free for all

“Ma manda dos carta na despacho di gobernador pa inform’e cu mi no ta de acuerdo cu e procedura den Parlamento pa loke ta e votacion y tambe e validez di e mocion di desconfianza (y demas mocionnan),” Lopez Tromp a bisa. E ta basa su mes riba Constitucion, cu ta mustra cu no tabatin quorum den Parlamento, pasobra no tabatin mayoria miembro di Parlamento fisicamente presente den sala pa vota. Lopez Tromp a bolbe reitera locual el a bisa Dialuna ultimo, esta cu e mes tabata Presidente di Parlamento y conoce e Reglamento di Ordo bon.

Un palabracion pa Covid, unda ta tene distanciamento social ta conta unicamente pa e debatenan, pero ora di reunion, tanto Constitucion cu ta e ley mas halto, pero tambe Reglamento di Ordo ta rekeri presencia di mayoria pa vota den sala. Y e votacion mester bay hopi cla. E Griffier ta nombra e Parlamentario, y e unico cos cu por bisa ta pro of contra. Cualkier otro palabra adicional ta haci e voto uno invalido. Marisol Lopez Tromp ta insisti cu Parlamento di Aruba no conoce abstencion di voto.

Presidente di Parlamento Ady Thijsen a entrega keho di difamacion contra e Minister pa motibo di lo a insulta hasta e Griffier suplente. “E ta sinti cu mi a atacha su credibilidad y integridad y tambe di e organo di Parlamento. Pero mi ta kere cu tur hende tabata y ta testigo si wak e imagennan di video di e reunion. Tur hende por wak cu nan mesun wowo kico a sosode e dia ey. y cu e mocion cu no ta na su luga y invalido.”

Lopez Tromp a bisa cu el a ricibi un cantidad di reaccion for di expertonan huridico te na personanan for di Reino Hulandes, cu tabata preocupa riba e procedura cu el a hiba y tambe riba e hecho cu awor el a entrega un keho. Minister Lopez Tromp a bisa cu e argumentonan di Thijsen no ta corecto y cu tin un Reglamento di Ordo pa evita cu tin un ‘free for all.’ E forma con pa hiba e votacion pa e mocionnan no ta corecto y procedura no a bay segun ley y ta atacha integridad di e votacion.

Caso Dammers

Marisol Lopez Tromp a atende cu e ehempel cu Presidente di Parlamento a uza pa ilustra cu e Minister no ta integro, cualificando e como ‘Caso Dammers.’ “E la bisa cu mi a keda sentencia. Mi kier bisa enfaticamente cu esey no ta asina. Si ta asina, con por ta posibel cu awe mi por ta Minister. Con ami por a pasa un screening manera ami a pas’e den e forma rigoroso cu a hib’e, for di aña pasa te na Januari e aña aki. Mi kier puntr’e na mesun momento pa e splica con Marisol Lopez Tromp por tabata Ministeriabel y e si por a pasa e screening.” Lopez Tromp ta lamenta cu e caso Dammer tabata anula (gesponeerd) y cu Thijsen ta uz’e pa argumenta locual no ta al caso. Como tal, den su keho na Ministerio Publico, e ta exigi rectificacion di Ady Thijsen den un tempo defini.

Manda ley pa gobernador

E Minister ta urgi Prome Minister Marisol Lopez Tromp pa pura manda e ley di su retiro pa gobernador. “Ta for di Diahuebs siman pasa a bin cu e mocion. For di e momento ey e mocion mester a core su caminda pa Gobierno y di Gobierno pa gobernador.” Ainda e proceso ey no a sosode, y si ta asina cu Prome Minister ta haya cu presencia di Minister Marisol Lopez Tromp ta tranca Gobierno, anto e mester pura cu e ley. E Minister a haci e expresion aki basa riba declaracionnan di Prome Minister Evelyn Wever Croes kende a bisa cu mester a cancela reunionnan di Conseho di Minister na dos ocasion, mientras cu tin temanan crucial pa atende. Manera, e crisis di salud, e crisis financiero, economico, laboral. Pero, ningun momento Lopez Tromp lo ta stroba pa trata e temanan aki. “Pa mi Gobierno ta funcionando full swing y ami sigur tambe ta haciendo mi trabou. Pues mi no ta tranca Gobernacion.” De paso, Marisol Lopez Tromp a mustra cu Aruba conoce Ministernan cu ta hopi ausente pa motibo di biahe, y asina mes Gobernacion ta sigui.

Consecuentemente pa evita cu ta uza esaki contra dje, Marisol Lopez Tromp a manda un carta pa Prome Minister pa “fast-track e mocion pa gobernador, ya cu Prome Minister a expresa cu e ta para tras di e mocion. y cu e ta considera esaki legal. Si ta asina e pensamento ta, anto mand’e mas lihe posibel pa gobernador pa asina haya claridad y pa Gobernacion por trece punto final na e incertidumbre cu e mes a crea.” Segun Lopez Tromp, no tin nada ta stroba Prome Minister pa manda e ley pa gobernador.

Tira pisca

E claridad aki ta necesario pa e grupo di piscado cu ta wardando pa nan por tira pisca. Pasobra e mocionnan a pasa sin cu tin mayoria, pues den su concepto, lamentablemente, tambe e mocionnan pa permiti e gedoogbeleid ta invalido. E Minister ta nenga cu e tabata haci dificil pa piscadonan tira pisca. E ta sigura cu ningun momento esey tabata e caso, y cu el a sostene e decision di Conseho di Minister, numa cu e mester percura cu tin condicionnan stricto, pa evita cu henter comunidad bula den awa y tira pisca, haciendo bida di e grupo di meta mas dificil ainda. El a bolbe enfatisa cu e no ta stroba ningun gedoogbeleid ya cu esaki ta den man di su coleganan Andin Bikker di Husticia y Cris Romero di Sector Primario.

E Minister no ta kere cu e palabranan di advertencia cu el a uza na direccion di Parlamentarionan mester ta considera duro, ya cu nan ta honesto y teniendo cuenta cu tur ley. “Un politico ta haya hopi palabra di insulto. Pero ami ta duna honor na leynan cu mester defende.”

Desmenti rumornan

Manera cu el a bisa na Bon Dia Aruba ayera, e Minister a sigura cu ainda e ta Minister encarga cu DIP y otro departamentonan y ta su tarea pa sigura cu e trabounan ta anda bon. Pero e ta enfatisa cu contrario na rumornan cu hasta Prome Minister a menciona, e no a tuma ningun hende den servicio, ni na su buro di Minister, ni na ningun otro departamento. Al contrario, el a hasta manda hende cas.

Lopez Tromp ta bisa cu e no ta un Minister independiente pasobra no tabatin mayoria cu a dicidi pa bah’e como mandatario y cu el a huramenta pa sirbi Pais Aruba. E mes no ta kere cu tin sentido pa combersa cu Prome MInister mas, kende a tuma varios dia prome cu a puntr’e di con e ta contra e ‘gedoogbeleid’ (algo cu e ta nenga), pasobra a combersa hopi biaha riba diferente tema, manera Parke Nacional Arikok, e problematica di UTV, Incinerator, y te hasta riba e mediacion. “Cada biaha mi mester tende cu ami ta tranca Gobernacion. Mi no kier ta un estorbo, pues mi kier pa ‘fast track’ e mocion.”