Diahuebs ultimo tabata un dia cu basta polemica den organo legislativo di Aruba, por a keda conoci cu durante un reunion publico di Parlamento cu tabata atende e asunto di tiramento di pisca e parlamentario di lider di fraccion di partido MEP Rocco Tjon a trece dilanti un mocion di desconfiansa pa minister Marisol Lopez Tromp.

E mocion aki a conta cu 10 voto na fabor, 8 di parti di e fraccion geel y dos di parti di e fraccion blauw, pero manera ta conoci ta 11 voto of mas cu mester tin pa por pasa un mocion asina of un ley, pero segun presidente di parlamento Ady Thijsen esaki tabata na su luga aunke no tabatin presencia di parlamentarionan di partido AVP ni di partido di RED cu a argumenta cu nan no tabata di acuerdo cu e accion aki.

Ayera mainta, el a yama medionan local pa splica durante un conferencia di prensa pa via di cierto speculacion cu e noticia aki a causa riba rednan social, el a menciona cu e decision pa loke ta trata e mocion di desconfiansa pa minister di Infrastructura, Medio Ambiente y Desaroyo Teritorial Marisol Lopez Tromp ta valido, “nos ta traha segun e ley y segun nos constitucion”, el a sigura.

Asina mes, el a conta cu pais a enfrenta cu e situacion di Covid-19 y cu den parlamento nan a haya tres persona cu a wordo contagia di e malesa aki, den ora ey nan a yega na un acuerdo segun e reglamento di ordo cu Thijsen a comenta cu pa haci un cambio, por haci’e pero tur e 21 parlamentario mester ta di acuerdo.

Di esaki, el a splica cu nan a traha un regla cu tur di nan tin cu pone cu nan ta bay di acuerdo, -incluyendo e parlamentario di partido AVP Michael Lampe cu na e momentonan aki ta na Hulanda y cu tambe mester duna su aprobacion-, cu esaki a wordo implementa desde maart di e aña aki y tur e reunionnan a bay asina.

Di loke ta trata e situacion di diahuebs ultimo, Thijsen a indica cu na e momento cu nan a cuminsa e reunion cu mester tin 11 hende minimo pa cuminsa e reunion, el a sigura cu 18 persona a firma y di eynan e reunion a cuminsa cu su prome ronda, di dos ronda tambe a bay door, despues a bin tres mocion cu a wordo entrega y e reunion a yega na su fin.

Tocante e mocion di desconfiansa cu parlamentario Tjon a entrega, Thijsen a bisa cu ora esey a wordo entrega otro personanan caba ya tabata tin conocemento di esaki y ora ministernan a papia nan a pidi pa schors e reunion y asina nan por mira kico nan ta bay haci. Asina mes el a sigura cu na e momentonan aki tabatin mas cu 11 persona den sala.

“Na e momento ey a mi por cuminsa cu stemmen, pasobra mi tin mas cu 11 hende eyden”, el a enfatisa.

Despues di esaki, el a sigura cu parlamentarionan di fraccion di AVP y RED a sali y bay pa motibo cu nan a abstene, “si nan tabata kier pa e coy no bay door nan no a mester ni bin den sala sino, a mi no por cuminsa cu stemmen pasobra mi no tin 11 hende, ma cuminsa e reunion cu nan tur tabata eyden”, Thijsen a señala.

“E punto importante ta cu e procedura a bay bon y no bin hunga wega cu a nos ta haci e trabou aki di un manera cu nos no ta haci’e bon y a mi como presidente di Staten mi ta carga e responsabilidad pa esaki” Thijsen a enfatisa.

Tambe, el a trece dilanti cu e topico ta di piscadonan y nan a bay na dos reunion publico despues nan a bay un openbare vergadering, y nan a acepta cu nan tabata presenta un solucion ayera, lo cual tabata e orden, nan a dedica tempo na esey “te ora cu minister Lopez-Tromp a dicidi di tira riba e parlamentarionan cu nan ta insinua y acusa cu nan ta traha contra ley e ora ey el a crea un kiebro entre parlamentarionan y lamentablemente e mester bay asina”, Thijsen a declara.

Den mesun linea, el a comenta cu ni un minister no kier mocion di desconfiansa y cu minister Lopez- Tromp tin tur derecho di bisa cu esaki ta inhusticia, “e tin su derecho di sinti esey y e tin su derecho di cana su caminda”, pero cu no ta e esun cu a dicidi, den caso aki parlamento tabatin un mocion y esey a wordo acepta den manera cu nan a vota, awor e ta keda na gobierno pa bay gobernador.

Ta importante pa trece dilanti cu na e momento di ciere di edicion aki, gobernador Alfonso Boekhoudt a yama presidente di parlamento Ady Thijsen pa tene un reunion cun’e.

Thijsen a relata cu e reunion aki a “bay bon”, sin duna mucho detaye.