Presidente di parlamento, Ady Thijsen, a considera cu pa e organo legislativo tabata un honor di por a ricibi minister di Finanzas, asunto Economico y Cultura, Xiomara Maduro pa entrega e presupuesto 2020.
Sr. Thijsen a sigura cu pa fin di luna pais Aruba lo por conta cu un presupuesto trata y aproba. “Ami ta kere si cu prome cu fin di maart nos ta bay tin e presupuesto cla y trata,” el a bisa. E ta kere cu mita di e luna aki eventualmente e debatenan lo cuminsa den reunion publico.
E prome cos cu e lo haci ta bin cu un comision central pa duna e periodo cu e parlamentarionan ta haci nan preguntanan. Apesar cu nan ta preta den tempo, pero nan lo hacie di un forma rasonabel. “Mi ta kere cu e parlamentarionan ta hay’e y nan ta bay haya e tempo pa nan haci nan preguntanan,” el a bisa. Pero tambe ta keda na minister y su departamentonan pa contesta e preguntanan y esey tambe ta tuma su tempo.
E debate mester bin ya cu esaki ta e trabou di e parlamentarionan. Pero e lo percura pa e tuma luga debidamente y cu respet percurando pa evita cualkier disturbio. E ta haya cu na momento cu el asumi e responsabilidad aki, e reunionnan ta tumando luga den un manera nechi y na ordo. “Ami ta kere cu e ta bay ta un bon debate y fuerte,” el a declara.
Mirando cu minister Maduro lo haci uzo di sistema digital pa ilustra su presentacion cu algun grafica y tabla, presidente di parlamento a bisa cu e organo legislativo lo percura pa nan sistema nobo por traha bon, ya cu durante e ultimo reunionnan a yega di presenta problema tecnico. El a declara cu semper nan intencion ta pa nan por brinda nos comunidad e transparencia durante e debate. El a reconoce cu ta fastioso ora cu nan sistema ta cay, pero e ta algo for di nan alcance.
