Presidente di Parlamento a reacciona riba Knops y Bosman

Presidente di Parlamento di Aruba, Juan (Ady) Thijsen a declara cu e no kier crea un controversia cu Hulanda. Pero si e mester reacciona riba ultimo declaracion haci pa Secretario di Estado, Raymond Knops, y tambe riba e miembro di Tweede Kamer, Andre Bosman (VVD). E ta haya cu ta importante pa e hacie como presidente di Staten, mirando e funcion cu tanto Knops como Bosman ta representa na Hulanda y den reino.

E no ta haya cu e tipo di declaracion cu Knops a haci pa degrada nos status den reino, no tin hustificacion. El a bisa cu Secretario di Estado di Hulanda a bin cu dos punto dilanti cu mester pone atencion riba dje. Uno cu nos no por maneha nos autonomia. Otro punto cu el a trece dilanti ta cu pais Aruba no tin su presupuesto na ordo. “Cual no ta berdad!”, Sr. Thijsen a declara na Bon Dia Aruba.

Pa loke ta concerni e prome punto, Sr. Thijsen a bisa cu Aruba ta maneha su autonomia. Tin cierto cosnan den pasado cu no a bay bon riba parti financiero, pero pais Aruba ta drechando e situacion aki. Te hasta Hulandes mes a bin cu supervision financiero pa tres aña ‘cual nan no a haci’e bon.’ E mesun situacion e ta haya cu a surgi na Corsou y St. Maarten. E no ta bay papia pa e dos isla aki, pero si e ta solidario cu nan. Aunke mester tene na cuenta cu nan tin otro status aparte cu nos.

E situacion financiero cu nos ta pasando aden debi na e Covid, tur otro pais y partner den reino a hay’e. Sr. Thijsen a indica cu Aruba tabatin un situacion financiero prome cu Covid y despues di dje. Prome cu dia 13 di maart ultimo cu Covid a presenta na Aruba, parlamento a yega di aproba un presupuesto 2020 cu un surplus di 49 miyon florin den dos aña. “E no a cay for di shelo. Nos a traha duro p’e. No bin bisa nos cu nos no tin nos presupuesto na ordo. E no ta husto pa hende cu ta traha duro…” el a bisa.

Ora cu Covid a bin cu su efecto riba nos economia, mester adapta e presupuesto debi na e crisis financiero causa pa e virus aki. Un situacion cu a pone nos haci uzo di articulo 36 di status di reino pa pidi ayudo financiero di Hulanda. Pero si el a bisa cu “Aruba no ta mendigo.” Ademas nos ta den reino hunto y nos mester yuda otro. Pero net awor, Hulanda no ta duna nos, pero si nan ta fia nos na cero interes, pero bao condicion. Nan intencion prome pa medio di CAFT tabata pa cobra interes. Pero ta placa fia na cero interes cu nos mester paga bek.

Thijsen ta lamenta cu tur loke Hulanda kier a haci prome pa impone riba nos, no a logra. Pero awor cu nos ta den un situacion financiero dificil, sin un caminda di bay, Hulanda ta bin cu condicionnan pisa riba nos. Nan kier pa bin reforma riba diferente tereno. E no ta contra reforma, specialmente den e situacion crisis aki cu mundialmente mester ta prepara pa e normal nobo. Pero e ta haya cu prome cu Aruba bin cu reforma, nos mester lanta nos economia bek, pa asina cuminsa cu e reforma aki. No awor cu tin cantidad di hende cu ta purba sobrevivi cu e ayudo di FASE. E situacion aki lo bira mas dificil, si mester manda mas hende cas. E ta trece un situacion di instabilidad y discordia.

Presidente di Parlamento a bisa cu e no ta criticando of busca problema cu Hulanda. Pero si djis splica con e situacion ta hinca den otro. E ta wak cu tin biaha declaracion ta wordo haci, sin cu nan no sa historia di nos relacion den reino. El a bisa cu nos status aparte tabata a base di un lucha y no algo cu nos a sinta negosha. Ademas cada pais di Reino tin su estado di derecho y Aruba no ta un provincia of municipio di Hulanda. Cada un ta diferente tambe, pasobra Corsou y St. Marteen tin otro areglo den Reino cu nos tin.

Presidente di Parlamento, Juan (Ady) Thijsen a bisa cu e no kier bay den discusion cu e miembro di Tweede Kamer, Andre Bosman (VVD). Pero si el a yega di conoce Bosman su actitud arogante. Durante un reunion di IPKO, unda nan tabatin diferencia di opinion pisa, ora cu e politico Hulandes a purba di bin cu un ley cu tabata pone ciudadanonan di reino den segunda categoria.

Un ley cualifica pa comision di Union Europeo cu ta atende cu derecho humano como discriminatorio. Awor e mesun politico aki ta bin divulga cierto rapport via Facebook cu e mesun Bosman no ta para responsabel pa nan, ya cu e no sa e fuente di nan. No ta cuestion cu e ta defende corupcion, pero e ta haya cu “loke Sr. Bosman ta haci ta hopi fout.” Pero Sr. Thijsen ta prefera di no pone mucho atencion na dje.