For di 2012 Aruba mescos cu otro pais a wordo decreta pa celebra Siman di Enfermeria. E siman aki a cuminsa dia 6 di mei y ta culmina mañan 12 di mei riba Dia Internacional di Enfermeria.
Sharline Faro di Organisacion di Enfermeria di Aruba (ODEA) a bisa cu tur trahado di enfermeria ta consciente cu nan no por traha nan so, sino cu nan ta depende di tur partner den salud publico, pa asina carga hunto salud publico na laira. P’esey den nan dia special nan kier gradici tur trahado di salud cu ta traha hunto cu nan pa combati cu e pandemia di coronavirus/Covid-19.
Mirado cu mundo henter ta pasando pa e pandemia di Coronavirius/Covid-19, tin pais cu a dedica henter un luna pa duna reconocimento na e trabao cu e profesionalnan di enfermeria ta bin realisando. Pero tambe pa nan tin mas espacio pa por para keto pa reflexiona riba e trabao di enfermeria den un comunidad y den henter mundo.
Nan meta como trahadonan di salud y dunado di cuido ta di por pasa e pandemia aki cu tur control y menos morto cu ta posibel. Ta algo cu nan no por evita. Sinembargo si nos ta compara nos mes mundialmente, te ainda nan ta resa y gradici Dios cu e personal di enfermeria ta balente. Tambe nan ta practicando loke nan a siña.
“Nos tin enfermeronan cu a wordo contagia y danki Dios tur a recupera te cu awor. Y nos ta sigui den esaki,” el a bisa.
Presidente di ODEA a laga sa cu e aña aki a wordo decreta como Aña di Enfermeria. “Hamas niun por imagina nos mes cu esaki tabata kiermen cu di e forma aki enfermeranan lo a wordo balora den comunidad,” Faro a bisa. Desde cu Covid-19 a haya forsa produciendo cantidad di pashent y victima, trahadonan di enfermeria ta para den e prome linea hunto cu otro trahado di salud y otro cuerponan cu ta bataya contra e virus aki.
El a bisa cu awe diferente generacion cu a studia enfermeria no por imagina nan mes cu na 2020, nan lo wordo prueba den nan profesion pa cu un pandemia Covid-19. Segun presidente di ODEA awor nan ta enfrenta e virus aki, specialmente esun envolvi directamente, cu un serie di proteccion. Sinembargo e ta haya cu e Covid-19 a bin tambe pa siña nos hopi cos di para keto y reflexiona.
Pero sigur e ta haya cu e reto cu e virus aki a bin ta pa test tur profesional di enfermeria y dunado di cuido, riba nan vocacion. Pero banda di vocacion tambe tin e parti di educacion, el a bisa. “El a test nos vocacion. El a test nos educacion. E ta test nos disponibilidad. E ta test nos profesionalismo y sigur nos perseverancia,” el a bisa.
Tambe ODEA ta gradici tur pashent cu ta esunnan cu ta ricibi e cuido pa nan comprension, y cu nan ta consciente tambe pa cuida nan mes, pa asina yuda personal di enfermeria cuida boso.
