Diaranson pasa, Presidente di Mexico, Andres Manuel Lopez Obrador a pronuncia riba intervencion, ora el a comenta riba e declaracion di e mandatario Mericano, Donald Trump, tocante su intencion di nombra e cartelnan Mexicano como organisacionnan terorista.
Tocante e declaracionnan, cu lo por implica accionnan Mericano contra e gruponan criminal aki, Lopez Obrador a expresa cu e no ta desea di causa polemica riba e tema aki.
“Cu e dia di accion di gracia cerca, mi kier manda un brasa pa Mericanonan. No ta un dia bon pa confrontacion politico, mañan ta dia di accion di gracia; mi kier desea pa boso felicidad”, el a declara.
Sinembargo, canciyer Marcelo Ebrard a indica cu tin instruccion pa trata e tema aki, pa loke sigur e minister lo informa den dianan aki.
Gobierno di Merca ta asisti pa e investigacion di e masacre di e famianan mormon cu a sosode dia 4 di november ultimo na nort di Mexico, den cual a muri tres muhe y seis mucha, debi cu e victimanan tabatin dobel nacionalidad.
Famianan di e victimanan a pidi pa Gobierno Mericano clasifica como ‘terorista’ e cartelnan di Mexico.
E mandatario Mericano a bisa diamars pasa cu lo pretende di nombra e cartelnan Mexicano como organisacion terorista stranhero, y a sigura cu lo enfrenta sin problema e polemica cu a resulta di e tema aki.
