Presidente di IOWUA: “Nos no ta strike”

Aña 2009 ta cera cu e noticia cu Citgo a informa su trahadonan pa medio di un carta, cu despues di dia 30 di januari 2020, nan lo stop nan actividad completamente na Aruba.

E compania a ofrece un pago di cesantia pa nan servicio, locual e trahadonan afilia na IOWUA (Independent Oil Workers Union of Aruba) y esunnan di staf afilia na FTA (Federacion di Trahadornan di Aruba) a rechasa di biaha.

E situacion di e refineria tabata un topico cu a destaca hopi durante henter aña aki. A pesar cu e panorama di e refineria no tabata uno positivo, e decision oficial y definitivo cu Citgo lo stop tur actividad na Aruba, a cay pisa specialmente den e temporada aki di fin di aña. Principalmente pa e trahadonan, entre nan esunnan cu ta bin trahando den e refineria pa basta aña, for di tempo di Coastal.

IOWUA.
Presidente di IOWUA, Boy Anthony a laga sa na Bon Dia Aruba cu el a manda un mensahe cla pa e trahadonan pa tur hende sa su opinion. Ora cu e compania a pidi pa e sindicalista yama un reunion cu e trahadonan pa ofrece nan pakete di retiro, e sindicato a manda un carta pa tur su miembronan.

E carta a wordo firma y manda pa e compania. Pues gerencia di e compania tin e carta ey, caminda e punto principal ta: E trahadonan no ta acepta e pakete cu Citgo ta ofrece nan. E prioridad di punto uno ta pa e trahadonan por haya loke nan kier. Igualmente nan kier pa mas hende cu ta posibel keda opera e planta. Tambe IOWUA kier pa Citgo respeta e contract colectivo (CAO).

Presidente di IOWUA a laga e trahadonan sa cu el a papia cu minister di Labor, Glenbert Croes kende a compromete su mes y priminti cu e no lo firma ‘ontslag’ of retiro, te ora cu e pakete di retiro ta wordo negosha debidamente. Aworaki nan ta den e fase pa atende cu e negociacion di e pakete cu mester ta uno bon pa e trahadonan.

Trahadonan y operacion.
Pregunta manera cuanto trahadonan ta bay keda y kende ta bay opera e terminal, ta preguntanan cu te ainda IOWUA no lo por haya contesta. Pero te aworaki nan no ta un prioridad.

E sindicalista a bisa e trahadonan cu aworaki nan tin cu deal cu Citgo. Pero na momento cu nan ta caba cu Citgo y cu e compania aki por paga tur hende locual mester ta, mester deal cu e otro compania cu lo tuma over. E no sa si ta Refineria di Aruba (RdA) of si lo traha un team nobo pa dicidi kende lo tuma over, ya cu esaki ta e di dos escenario. Te ainda e sindicalista no sa ken lo bira operador di e terminal. Igualmente el a bisa e trahadonan cu mesun cos a pasa tempo di Coastal, y tambe cu Valero. Pues nan no tabata esunnan cu a dicidi ken ta keda, sino cu e compania mes a kies e trahadonan cu a keda traha cu nan.

Pa IOWUA e prioridad ta keda e fase di negocia e pakete, pa tur trahado por haya e miho pakete cu ta posibel. Nan a haci un proposicion, y nan mester warda e contra proposicion di Citgo. Unabes cu nan ta haya un contra proposicion di e compania, di biaha nan lo atende cu nan abogado.

Accion.
Pa presidente di IOWUA no ta aceptabel pa niun otro sindicato papia den nomber di IOWUA. Encuanto un posibel aliansa cu FTA, Anthony su opinion ta cu e no ta mira esaki posibel. Te hasta e ta corda cu na 2006 ora cu nan a bay den accion y para trabou, nan no a haya solidaridad ni sosten di staf, sino cu staf a bay traha overtime.

“No bin papia di weso di lomba cu mi”, el a bisa. Sinembargo el a yega di informa e personal di staf cu ta afilia na FTA cu IOWUA ta apoya nan pa haya lo maximo, pasobra RdA no tin placa.

Tambe e ta join cu nan pa siguridad na nan trabou y pa tene mas hende posibel na trabou. Pero el a bisa rotundamente cu IOWUA no ta bay den accion cu nan, pasobra nan ta duna asina motibo pa e compania kita e trahadonan. El a bisa cu mester tene cuenta cu e compania ta pagando salario di e trahadonan y tambe mester tene cuenta cu e terminal ta un ‘landsbelang’.

El a argumenta cu si eventualmente lo bin un accion pa stroba operacion den terminal, hues lo pone e trahadonan traha bek mesora, pasobra nan no ta bay perhudica Aruba pa e trahadonan. E ta haya cu si staf ta dicidi di bay den accion, nan mester tene e barco afo, pasobra si e barco yega y nan ta mare den terminal, nan como trahado ta zorg pa haci e trabou.

Anthony su conseho pa e trahadonan afilia na IOWUA ta cu mester evita di perhudica pueblo cu un accion asina, ya cu asina tambe nan ta evita cu opinion publico lo por bolter contra nan.