Presidente di IOWUA, Boy Anthony: Trahadonan di refineria kier garantia

ORANJESTAD – Presidente di sindicato IOWUA, Boy Anthony, a laga sa cu e compania Citgo mester cumpli cu e compromiso cu nan tin cu nan trahadonan. Cantidad di trahadonan, mayoria di nan trahando cu contratista, ta perdiendo nan trabou, despues cu Merca a bin cu sancion mas pisa contra e regimen Maduro y contra PDVSA.

Segun e sindicalista, e preocupacion ta keda ki garantia e compania ta duna nan trahadonan pa e problema cu e trahadonan tin ta wordo soluciona. E ta espera cu e reunion cu eventualmente lo tuma luga entre e abogadonan di e diferente partner envolvi lo duna fruta na Merca pa busca un solucion. Ayera durante un conferencia extraordinario, e prome mandatario a informa cu e reunion ta tuma luga awe na Houston.

Pero IOWUA ta consciente con gobierno di Merca, bou presidente Trump ta, y di otro banda nan sa e situacion actual na Venezuela. “Kiermen e ora bo ta puntra bo mes con e trahadonan ta para.” Pero tambe ki garantia nan tin, ya cu te ainda Citgo no a duna un garantia, ya cu ‘garantia ta algo hopi grandi,’ segun Anthony.

E ta afirma cu comunicacion ta hopi importante, pasobra con bon of con malo e situacion ta, bo tin cu trece dilanti. E ta haya cu e trahadonan ta esun prome responsabel pa mantene tur operacion. “Nos ta e prome ora cu hende ta drumi, nos ta den e luga ey ta traha pa zorg cu e luga ey draai.”

E sindicalista ta considera cu e trahadonan ta esunnan cu mester haya sa kico ta pasando cu e situacion di e refineria. Aunke den nan ultimo combersacion, gerencia di Citgo Aruba a priminti cu nan lo keda den comunicacion cu IOWUA. Si tin cambio, esaki lo wordo treci na e sindicato y na e trahadonan.

E ta haya cu no ta por nada cu staf di e refineria, cu nunca a yega di afilia na un sindicato, lo participa diabierna awor den un referendum pa busca afiliacion di FTA. Esaki debi cu nan tin nan preocupacionnan, y nan ta mira kico ta pasado internamente cu e refineria. Di otro banda, e trahadonan na servicio di e contratistanan tin nan compromisonan tambe. Nan tin cu paga hipoteca, recibo di awa cu coriente, y di otro servicionan. Pero tambe nan tin nan famia, y si e doño di e compania di contratista no ta haya placa pa paga su trahadonan, nan ta esunnan perhudica. Pues e trahado ta keda den un skina hopi fastioso.