Presidente di IOWUA, Boy Anthony a bisa cu e no a firma nada ainda cu por compromete e posicion di e trahadonan. “Nos no a firma nada!”, e ta bisa.
Locual a wordo firma ta un carta cu tur trahado a firma cu nan kier “successorship”. E carta aki tabata un forma di proteccion den nan contracto colectivo (CAO), caminda e companianan Citgo y e compania estatal cu ta na caminda Refineria di Aruba (RDA) mester reconoce e sindicato cu ta representa e trahadonan, y cu nan no mag di touch ningun di nan beneficionan.
Ademas di e proteccion di nan CAO y ley laboral, sindicato tambe tabata kier esaki por escrito entre IOWUA, Citgo y Valero como un siguridad cu nan no lo mishi cu nan beneficionan adkiri. Citgo a keda di traha e successorhip cu mester firma entre nan, pero dor cu representante di Citgo mes no a presenta den e reunion aki, IOWUA a pidi Valero pa anula esaki te ora cu tur e partidonan ta sinta hunto.
Sr. Boy Anthony a bisa cu el a sinta cu minister Paul Croes pa sigura cu e trahadonan no lo wordo perhudica cu e negociacion haci cu Valero y Citgo.
“Nos tin un bon CAO. Nos tin un di e miho CAO cu tin na Aruba”, e sindicalista a declara na Bon Dia Aruba. Den nan contracto colectivo (CAO) nan tin un “successorship”, caminda si nan ta haya un doño nobo di trabou, e compania aki mester tuma nan cu tur e beneficionan adkiri. Sr. Anthony a expresa cu preocupacion eventualmente cierto beneficionan cu e trahadonan tin, RDA no tin.
Igualmente e trahadonan cu ta cay den Citgo, e compania aki mester reconoce e sindicato cu tur e beneficio cu ta den nan CAO, pero tambe e proteccion laboral cu ta hinca den nos ley tambe.
