ORANJESTAD – Durante e 15 seccion di e comision inter-gubernamental Oceanografico di Unesco (IOC) a duna un significativo mensahe di apertura. Un di nan ta esun di e presidente di IOCARIBE, Francisco Brizuela, kende a trece dilanti entre otro e impacto di problema di dramamento di azeta den paisnan cu gran parti di nan GDP ta depende di industria turistico.

Na inicio di su discurso, el a destaca e importancia di celebra nan di dos conferencia, cu ta wordo organisa e biaha aki na Aruba. E prome a tuma luga na Cartagena na 2017, y e ta kere cu nan mester preserva e bon practica aki. El a gradici e presencia di Gobernador di Aruba, Alfonso Boekhoudt, pero tambe na e comision organisado y henter pueblo di Aruba, cu a haci posibel e conferencia internacional aki.

E ta haya cu e conferencia aki ta tuma luga den un ‘contexto ambiental critico;’ pero nan ta dispuesto di contribui pa busca solucion riba temanan relevante: di sargassum, otro alganan y dramamento di azeta su impacto den nos region. E di dos tin di haber cu coral reefs, biodiversidad y cambio climatico; y e di tres Ocean Acidification. Nan ta asunto cu mester wordo atende, ya cu e fenomenonan aki ta causa daño grandi na e medio ambiente y economia di paisnan manera Aruba, unda turismo ta un fuente importante di GDP.

Un asunto cu nos isla a yega di confronta tin di haber cu e dramamento di azeta. El a bisa cu e problema mas tanto tin di haber cu e derame chikito di combustibel, manera esun cu e tankernan ta haci dilanti di e costanan of den lama. Aunke e volumen individual ta chikito, pero den conhunto nan ta nifica un fuente grandi di contaminacion pa e ocean y e costanan.

Modelo di sostenibilidad
Otro problema no menos grave tin di haber cu e situacion di coral reef, biodiversidad y cambio climatico; y e maneho cu lo por alivia pa atende cu e problemanan aki. El a trece como un bon ehempel e maneho cu Bucuti&Tara Beach Resort ta hibando pa opera di un manera sostenibel. Despues di e presentacion haci pa Nathaly Stamley di Bucuti&Tara Beach Resort tocante cambio climatico y industria turistico.

Sr. Brizuela a bisa cu nan a implementa un forma cu ta busca neutralisa e efectonan di carbon. Sinembargo, un alternativa asina ta exigi hopi inversion den un mercado cu ta demanda hopi inversion y frecuentemente ta laga masha poco pa e poblacion general.

P’esey e ta kere cu un tarea cu nan mester propone ta esun di canalisa esakinan na tur esunnan cu ta tuma e decisionnan pues e gobiernonan pa e tipo di iniciativa aki por bira den legislacion y maneho politico. Ya cu actualmente aplica e tipo di modelo di Bucuti&Tara Beach Resort ta depende di cada empresa y ta existi interes di diferente tipo. “Finalmente nos mester considera cu practicanan manera esaki lo por tin eventualmente menos costo y mayor eficiencia,” el a bisa.

E ta haya cu asunto aki ta uno cu nan mester evalua profundamente den seno di IOCARIBE, ya cu turismo ta un pilar economico importante den e region Caribe. Pero e ta haya cu en general, turismo ta un fuente considerabel di contaminacion di e recursonan marino. E enfoke nobo di e turismo alternativo of turismo sostenibel y residencial a bira un alternativa cu e paisnan lo por aplica pa nan propio beneficionan.