Presidente di Honduras, Juan Orlando Hernández, a ricibi miyones di dollar den soborno di narcotraficante a cambio di proteccion, incluyendo e capo Mexicano, Joaquin ‘Chapo’ Guzman, segun Fiscal di New York, Jason Richman a sigura, ora el a cuminsa e huicio pa narcotrafico di e ruman homber di e mandatario na un corte di Manhattan.
Fiscalia di districto sur di New York ta acusa e ex-diputado Hondureño, Juan Antonio ‘Tony’ Hernandez Alvarado, di 41 aña, di cuatro delito di narcotrafico, posesion di arma di candela y ganamento pa autoridadnan.
Hernandez tin casi un aña cu ta den un prizon di New York, unda ta enfrenta un castigo minimo di cinco aña den prizon y un maximo di bida largo.
“Mas importante ta, cu e acusado tabata protegi pa e presidente actual di Honduras, kende a ricibi miyon dollar na soborno di narcotraficante manera ‘El Chapo’ Guzman, cu personalmente a entrega un miyon dollar pa e acusado pa su ruman homber”, e fiscal a bisa na e argumento inicial di e proceso.
Fiscal Richman a sigura cu Tony Hernandez tabata pertenece pa un ‘organisacion protegi pa Estado cu a distribui cocaina pa hopi aña’ na Merca cu e meta di haya miyones di dollar, y cu tabata protegi pa un red di funcionarionan Hondureño corupto, entre nan ‘“alcalde, legislado, general di e Fuerza Armada, Hefe di Polis’.
Richman a acusa tambe e ex-diputado di ordena al menos dos asesinato di narcotraficante entre 2011 y 2013.
Husticia Mericano ta sigura cu e placa di e droga a enrikece e acusado y a financia campañanan di varios candidato di su Partido Nacional, incluyendo esun di e ex-Presidente Porfirio Lobo (2010-2014) y esun Juan Orlando Hernandez, cu a ser eligi na 2013 y reeligi den un eleccionnan cuestiona na 2017.
