Presidente di HAVA, Dr. Joaquin van Trigt: Sector di cuido basico ta den su ultimo rosea

E palabra ‘ultimo rosea’ a popularisa. El a bira parti di e lenguahe frecuente uza pa ilustra e situacion dificil actual cu Covid crisis a trece cune, y cu tur sector y comunidad ta pasando aden.

Ya no solamente ta wordo papia di rosea financiero di parti di gobierno y sector priva. Pero tambe ta wordo papia riba ultimo rosea den cuido di salud cu ta uno masha delicado, ya cu akinan nos ta papiando literalmente di ultimo rosea cu por nifica bida di hende. Manera presidente di Asociacion di Dokter di Cas (HAVA), Dr. Joaquin van Trigt a yega di expresa durante un conferencia di prensa cu presencia di diferente gremio na ATIA, ayera merdia.

E preocupacion central tabata cu e dunadonan di servicio basico di salud nan rosea financiero a caba. Esaki ta trece como consecuencia cu nan no por garantisa e calidad di servicio mas na nan pashentnan.

E representantenan di ASHA, ATIA, AHATA, AGA, KvK y Botica a mustra nan solidaridad cu HAVA. Pero tambe e gremionan aki a vocifera nan preocupacion existente den nan respectivo gremionan.

Igualmente nan a pidi pa presidente di Parlamento, Juan (Adi) Thijsen por honra nan peticion cu nan a haci algun dianan pasa pa bin cu un reunion publico awe. E gremionan kier vocifera nan preocupacion. Tambe nan posicion tocante e negociacion entre gobierno di Aruba y Hulanda, dilanti nos organo legislativo.

Nan ta pidi pa gobierno finalmente por logra un acuerdo cu Hulanda, ya cu aworaki pais Aruba no tin mas alternativa, y nos situacion financiero ta birando cada dia mas precario.

HAVA

Dr. Van Trigt a bisa cu gewoon nan ta preocupa pa e calidad di cuido y tambe pa e peliger cu e pashentnan ta bay enfrenta. Te hasta e ta haya cu e prioridad ta un tiki robes. Mientras cu cuido di salud ta merece un tratamento cu un prioridad mas halto den full structura financiero di gobierno, sector publico ta hayando tur prioridad.

El a describi cu e situacion aki ta birando dia pa dia mas serio. Segun presidente di HAVA nan ta haya cu cuido di salud na Aruba no ta hayando e atencion, ya cu ta parce cu e prioridad ta mas den e sector publico. Eynan si gobierno ta dicidi pa paga salario completo, pero kitando afo e parti di solidaridad. Mientras cu e cuido medico –segun presidente di HAVA– ta e ultimo den rij. “Si resta placa pa nos por haya algo,” el a bisa.

E ta haya cu esaki ta un desaroyo peligroso. Na e momento aki nan ta sinti cu si no bin un solucion y un sosten financiero sostenibel, e sistema di cuido ta bay cay den otro. El a adverti cu nos tur ta bay sinti e efecto no solamente awor, pero pa e añanan cu ta bin. Te hasta por ta cu calamidadnan cu como HAVA nan no por para responsabel p’e.

Falta di cuido basico

Considerando cu dokter di cas, botica y/of otro dunado di cuido basico ta den e prome linea di cuido, esaki ta haci cu bo no ta bay haya e ayudo necesario na momento cu bo mester di dje. Por ehempel, algo cu por pasa cu ta prevenibel cu un pashent, si e ta wordo atendi na tempo debidamente. Pero si e situacion aki ta wordo posponi, y no ta wordo atendi inmediatamente, por ta den un par di ora e pashent por haya complicacion y te hasta fayece.

E ta sigura cu nan ta purba di mantene e calidad di cuido na un nivel mas halto posibel. Pero nan mester di recurso financiero pa sigui brinda e calidad di cuido necesario.

E ta argumenta cu nan ta purba di duna e miho cuido posibel, pero sin e medionan financiero pa nan por cubri nan gastonan di material y personal, dificilmente nan no por garantisa e calidad di cuido mas.

“Esey ta bay afecta nos pashent. E ta bay afecta nos comunidad cu ta bay sintie hopi pisa. Cu hasta por ta, ta bay tin perdida di bida cu nos no por ta responsabel p’e,” segun presidente di HAVA.

Como HAVA nan ta compronde cu den situacion di crisis tur hende mester ta solidario. El a laga sa cu esfuerso a wordo haci pa yega na un bon entendimento cu AZV y logra un acuerdo.

Sinembargo Dr. Van Trigt a bisa cu den un situacion di crisis bo no sa kico ta bay pasa. Cada luna ta un incertidumbre y cada luna por bin retonan nobo cu por cambia e situacion. Ta asina cu nan a presenta nan cifra pa nan por draai of “sobrevivi cada luna.” Pero na augustus ultimo gobierno a bisa cu no tin fondo pa cubri e gasto di AZV.

Di su banda AZV ta laga nan sa cu no tin placa pa paga e dunadonan di servicio di salud completo. Hasta AZV mes a bay bati porta di gobierno pa placa, pero gobierno no ta responde. “No tin dialogo mas,” presidente di HAVA a bisa. HAVA ta mira e desaroyo aki hopi preocupante.

El a gradici tur e gremionan presente cu a sostene e sector di cuido medico. HAVA ta spera cu gobierno por a scucha tur informacion duna ayera, caminda hunto cu e sector priva nan ta pasando den nan ultimo rosea. Nan no a hacie si e situacion no tabata critico, pero berdaderamente nan rosea ta cabando. Nan ta urgi gobierno pa tuma pronto e miho decision posibel den bienestar di nos comunidad y tambe di nos sectornan vital di pais Aruba.