(AP) — Presidente Guyanes, Irfaan Ali a bisa Associated Press ayera cu su pais ta tumando tur stap necesario pa protege su mes di Venezuela, cu a duna orden pa su companianan estatal explora y explota azeta y mineralnan den e region amplio di Esequibo na Guyana, cual Venezuela ta considera propio.
Contestando si a solicita asistencia militar, Ali a bisa cu su gobierno ta tumando contacto cu aliado partnernan regional, algun di cual Guyana tin acuerdonan di defensa cu nan, pa protege e region Esequibo, cual ta conta pa dos tercera parti di e pais.
“Nos ta tuma e menasa aki hopi na serio, y nos a inicia un cantidad di medida precuacionario pa sigura paz y stabilidad di e region aki,” Ali a bisa den un entrevista breve riba telefon.
El a nota cu Forsa di Defensa Guyanes tambe ta papiando cu contrapartinan na otro paisnan, pero no a bisa cua. “Si Venezuela sigui actua di e manera aventurero y descabeya aki, e region ta bay tin cu responde,” el a bisa. “Y esey ta loke nos ta construyendo. Nos ta construyendo un respuesta regional.”
Ali a papia un dia despues cu presidente Venezolano, Nicolas Maduro a bisa cu e lo otorga inmediatamente licencianan di operacion y explotacion na Esequibo, y a duna orden pa crea subsidiarionan local di companianan publico Venezolano, incluyendo gigante di petroleo PDVSA y conglomerado di mineria Corporacion Venezolana de Guayana.
Venezuela tin e reservanan di petroleo proba mas grandi na mundo, pero añas di mal maneho y sancion economico imponi pa Merca contra gobierno di Maduro a afecta PDVSA y su subsidiarionan.
Maduro tambe a anuncia e creacion di un Zona Operacional di Defensa Comprensivo pa e teritorio den disputa. E lo ta similar na e comandonan militar special cu ta opera den cierto region di Venezuela.
“E anuncio di Venezuela ta den desafio completo di ley internacional,” Ali a bisa. “Y cualkier pais cu ta desafia asina abierto e cuerponan internacional importante mester ta preocupa no solamente pa Guyana peor pa henter mundo.” El a bisa cu accionnan di Venezuela por afecta severamente e stabilidad y coexistencia pacifico di e region.
Ta spera cu Guyana a trece e asunto dilanti durante reunion ayera di Conseho di Seguridad di ONU.
Envolvimento di Merca
E presidente a bisa den un declaracion diamars laat cu su administracion a tuma contacto cu Merca, Brazil, Reino Uni, Francia, Secretario General di ONU, y Comando Sur di Merca, cu ta supervisa operacionnan militar den Centro y Sur America y Caribe.
Ali tambe a acusa Venezuela di desafia un veredicto cu Corte Internacional di Husticia na Hulanda a emiti siman pasa. Esaki a duna orden pa Venezuela no tuma ningun accion te cu e corte duna veredicto riba e reclamonan di e paisnan, un proceso cu ta spera por dura añas.
Gobierno Venezolano a condena declaracion di Ali, acusando Guyana di actua iresponsablemente y supuestamente dunando Comando Sur Mericano luz berde pa drenta region Esequibo.
Venezuela a haci un yamado pa Guyana reanuda dialogo y laga un banda su “conducta eratico, menasante y riesgoso.”
Ayera diaranson, Nacionnan Uni a emiti un declaracion resaltando e veredicto recien di Corte Internacional di Husticia prohibiendo partidonan di cualkier accion cu “por agrava of extende e disputa of hacie mas dificil pa resolve.”
Secretario General Antonio Guterres “fuertemente ta sostene e uso di metodonan puramente pacifico pa resolve disputanan internacional,” ONU a bisa.
E pelea diplomatico tocante Esequibo a intensifica na 2015 ora ExxonMobil a anuncia cu a haya cantidad grandi di petroleo cerca di su costa. Venezuela ta insisti cu e region ta pertece na nan pasobra Esequibo tabata dentro di su fronteranan durante periodo colonial Spaño. Venezuela ta rechasa e frontera cu arbitradornan internacional a delinea na 1899, tempo cu Guyana ainda tabata bao dominio Britanico.
E disputa a escala despues cu Maduro a tene un referendum diadomingo den cual Venezolanonan a aproba su reclamo di soberania riba Esequibo. Ali a bisa cu e referendum ta un “fracaso” y a bisa cu Guyana ta preparando pa cualkier eventualidad.
Procurador General Venezolano ta duna orden pa aresta tur miembro di oposicion pa complota contra referendum
Fiscal top Venezolano ayera a duna orden pa aresta un decena di miembro di oposicion, incluyendo ex-lider di Asamblea Nacional, Juan Guaido; y tres miembro di campaña di Maria Corina Machado.
Procurador General Tarek William Saab a acusa nan di conspira contra e referendum cu gobierno a tene diadomingo pa reclama soberania riba un gran cantidad di Guyana cual Venezuela pa largo a argumenta cu a horta for di nan ora di a delinea e frontera mas cu un siglo atras.
Saab no a presenta evidencia durante e anuncio riba television acusando e 12 adversario di gobierno, di cual tres so ta biba na Venezuela, di traicion, conspiracion y otro cargo. E tambe a vincula Savoi Jadon Wright na e caso, un ciudadano Mericano aresta dia 24 di october durante un bishita na Venezuela.
Saab ta acusa e miembronan di oposicion pa traha hunto pa afecta e resultado di e referendum. El a acusa Wright di usa criptomoneda y cash pa “evadi control financiero y sconde e origen y destinacion di e fondonan usa” den e supuesto conspiracion.
E anuncio a yega mientras gobierno ta continua defendiendo e cifra di participacion cu a reporta despues di e voto diadomingo. Gobierno a bisa cu como 10.5 miyon persona – tiki mas cu mita di votadornan eligible – a emiti nan voto, pero e cifra aki ta desafia loke hende a mira na centronan di votacion, unda e lineanan tipico durante eleccionnan Venezolano nunca a forma.
Gobierno di presidente Nicolas Maduro a tene e referendum pa supuestamente permiti Venezolanonan dicidi e futuro di e region Esequibo, rico den petroleo y mineral.
Di e 12 persona enfrentando aresto, solamente e tres campañador di Machado ta na Venezuela. Nan tabata na un conferencia di prensa di Machado na momento cu Saab a anuncia e cargonan contra nan.
Machado tabata e ganador di un primaria presidencial organisa dia 22 di october pa un fraccion di oposicion Venezolano sin asistencia di gobierno. E eleccion aki a surpasa expectativanan di participacion, incluyendo den barionan considera domina pa partido socialista den gobierno.
Machado a bisa reporteronan cu e participacion debil den referendum tocante Esequibo tabata “un derota monumental” pa gobierno di Maduro y a yama e accionnan contra su campañadornan “un gran eror.”
Famia di Wright a bisa cu el a keda aresta eroneamente y ta detenido pa diesmiles di dollar di rescate. El a keda deteni apenas algun dia despues cu gobierno Mericano a alivia sancionnan petrolero riba administracion di Maduro.
