Despues cu un grupo di prensa local a conoce – pa medio di un invitacion di e Grupo Martinón – nan producto hotelero na Punta Cana (Republica Dominicana), Presidente di e grupo aki, Enrique Martinón a contesta e preguntanan a base di e dudanan cu tin rond di e proyecto cu nan ta bin na Sero Colorado.

Construccion y Inversion
Grupo Marinón lo bin Aruba cu e marca Secrets, cu ta esun di nan nivel mas halto, dirigi na clientenan adulto so. Aunke nan tin varios hotel Secrets, cada un di nan tin un infrastructura of edificio diferente. Loke no ta cambia ta loke nan ta ofrece bou e marca aki. Den ROP ta poni cu e maximo cu nan por construi ta edificionan di 3 piso.

Nan tin plania pa cuminsa cu e construccion di e hotel na luna di november awor. Ya caba ta tumando luga algun estudio di e tereno y tambe e parti di structura. E hotel lo ta situa den un teritorio di 100 mil meter cuadra. Nan ta calcula cu e hotel aki lo keda cla aki 2 aña. E ta un inversion alrededor di 200 miyon dollar y nan lo wordo financia pa medio di banconan local y di afo.

Cuebanan y tunnel
Grupo Martinón ta consciente cu den e area di e construccion di e hotel tin cuebanan y tambe tunnel di awa cu un balor historico y patrimonial. Aunke cuebanan no ta cay den e tereno destina pa e hotel, si e tunnel ta pasa abou di e tereno aki. Nan intencion -segun Martinón- no solamente ta esun di percura di conserva nan, sino cu nan ta bay protege nan. “Claro cu nos ta bay mantene nan. Aparte cu e ta nos boluntad, e ta ademas un exigencia di gobierno. Y si e ta un exigencia, nos tin cu cumpli cune” el a declara.

E sitionan aki lo tin acceso publico pafo di e hotel. Ademas nan lo bira un atractivo adicional pa tur hende. Aunke Aruba tin un clima fantastico y beachnan bunita, pero no tin hopi atractivo turistico pafo di e hotel na Sero Colorado. Y e ta haya cu e cuebanan y tunnel aki por bira un atractivo den man di e operadornan di turismo y no den nan man.

Proyecto y trahadonan
Unabes cu e hotel ta cla cu su prome fase di 600 camber, nan lo evalua pa sigui cu e di dos fase di 300 camber mas na Sero Colorado. Te ainda no ta cla si e lo ta bou e mesun concepto di Secrets of di otro marca cu e grupo aki tin. Eventualmente e lo ta Now, cu ta un concepto dirigi pa e nucleo di famia. Martinón a laga sa cu nan kier bay poco poco, ya cu nan no kier satura of pone mucho presion den e area di San Nicolas y na Aruba henter, cu e construccion di e proyecto aki. Nan ta consciente cu e ta un volumen di camber hopi grandi pa ehecuta nan di biaha.

Tambe el a indica cu esaki ta un peticion cu nan a haya for di nos autoridadnan competente, pa no importa trahadonan, y traha cu e recursonan humano local. “Mi ta kere cu ta logico y sano pa wak prome con e ta funciona, prome cu nos ta cuminsa cu e di dos fase, debi cu nan ta inversionnan grandi”, el a declara.

Presidente di e Grupo Martinón a bisa cu ora cu nan bin cu un construccion di hotel den cualkier pais, trahadonan local ta wordo contrata, ya cu esaki ta yuda cu e inversion haci na e pais mes. Ademas e ta haya cu e hecho cu nan por haci uzo di e trahadonan local cu experiencia, ta miho cu importa trahadonan. “Semper ta complica importa trahadonan”, el a declara. No solamente e ta hay’e complica pa henter e proceso burocratico pa diligencia permiso di trabou. Tampoco ta facil pa e trahadonan por adapta nan mes pafo di nan pais.

Nan lo bin cu feria di trabou, unda nan lo busca tur trahadonan cu ta disponibel pa traha den nan proyecto na Aruba. Den caso cu nan no por yena tur nan vacatura disponibel pa funcionnan specifico, eynan nan lo diligencia permiso pa bin cu nan di afo.

Interes den Aruba
Martinón a laga sa cu nan ta di origen di Isla Canarias (Spaña), unda nan a cuminsa cu nan prome hotel. Nan ta mira hopi cos similar cu Aruba como nan clima, biento, tambe cu nan ta un isla chikito. Martinón a bisa cu e grupo, hunto cu su socio AMResort, a bishita Aruba den pasado, ya cu nan a haya opinion positivo. Asina nan a dicidi di haci contacto cu gobierno pa expresa nan interes.

P’esey e ta convenci cu e Grupo Martinón por desaroya exitosamente nan proyecto den un isla manera Aruba. A pesar cu nan sa cu e hotel lo wordo construi den un area caminda no tin mucho desaroyo turistico, y nan reto ta bira mas grandi. Otro reto cu nan a confronta tin cu haci cu e limitacion di e tamaño di Aruba. “No por bin cu mucho mas hotel”, el a bisa. Pero igualmente nan ta consciente cu e proyecto mester satisface nos hendenan. El a laga sa cu nos hendenan lo ta bon relaciona cu e proyecto aki.

Tambe nan marca como Secrets tin un compromiso social. El a informa cu nan tin campaña social hopi desaroya. Ademas, nan ta cumpli cu patronchi internacional na nivel di industria hotelero, dunando cantidad di ora di formacion na nan trahadonan.

Igualmente el a laga sa cu a pesar cu e hotel ta un ‘all inclusive’ bou nan concepto di ‘unlimited-luxury’, nan clientenan tin un poder di entrada halto. Aunke den nan pakete nan ta inclui por ehempel bebida premium y acceso na cuminda gourmet, e huespednan ta gusta sali. Pero di otro banda e ta haya cu ta importante cu e turistanan por haya alternativa y actividadnan unda nan por bay na Aruba. Un 30% di nan clientenan na Cancún (Mexico) -cu tin hopi actividad- ta sali afo pa disfruta di loke e destino aki tin di ofrece.

E ta reconoce cu Aruba ta un destino cu ta bon posiciona na Merca. E echo aki ta un aspecto cu e Grupo Martinón hunto cu nan socio AMResort a evalua riba nan plan di futuro destino pa expande nan marca den Caribe. E grupo ta traha exclusivamente cu AMResort den nos region y nan ta maneha 6 hotel di e grupo na Republica Dominicana. Aruba tabata un mercado cu AMResort -cu ta maneha e hotelnan di e Grupo Martinón- tabatin hopi interes riba dje, debi cu e marca Aruba su posicion den e mercado Mericano ta bon. E ta un factor cu nan ta considera valioso pa nan expansion y pa nan sigui crece. “E marca Aruba ta uno hopi reconoci y prestigioso. E ta un destino cu pa nos como grupo ta un orguyo di poder realisa un hotel”, el a bisa.