Na Republica Dominicana ta bin tumando un discusion tocante e eliminacion of no di nan escudo for di nan bandera nacional cu tambe a sali for di nan frontera, y cu a bin cay cerca e comunidad Dominicano di alrededor di 6.500 persona residencia na Aruba.

Diaranson atardi, presidente di fundacion Dominicana Arubanse Juan Pablo Duarte, Winston Tavarez a pronuncia su mes tocante un eventual intencion di kita e escudo for di e bandera Dominicana, loke a cualifica como un ‘preocupacion’ di e comunidad aki na Aruba.

Nan ta pensando di traha un carta y colecta firma pa asina expresa nan opinion y posicion conhuntamente cu e grupo Folclorico Cultural Dominicano y otro institucionnan mas. Mientras cu Ramona Campos Garcia, kende ta directora di e fundacion grupo Folclorico Cultural Dominicano, a bisa cu pa añanan e migrantenan Dominicano ta bon organisa y uni na Aruba. “Unidos jamás seremos vencido,” el a bisa.

El a declara cu e biaha aki nan a dicidi di uni nan mes cu otro organisacion mundial Dominicano, cu a expresa nan preocupacion tocante e eliminacion di e escudo for di nan bandera. Na Aruba tambe diferente organisacion civil y religioso a rechasa cualkier cambio riba e simbolo nacional y patriotico aki.

“Tambe nos ta bisa no. Nos no ta dia acuerdo pa e escudo lo wordo elimina for di e bandera. Nos tin cu conserva nos balornan patriotico,” el a declara. Campos Garcia a laga sa cu nan no por permiti como Dominicano cu pa mal politica y mal pensamento, nan por daña nan simbolonan patriotico.

Instituto Duartiano.
E fundacion Dominicana Arubanse Juan Pablo Duarte ta un filial di e Instituto Duartiano cu tin e meta di preserva y defende e principionan cu a inspira nan heroenan di independencia of ‘padres fundadores.’ Pero tambe e defensa di e simbolonan patriotico di himno, escudo y bandera.

P’esey den cuadro di e conmemoracion di e 175 aniversario di Dia di Constitucion, Tavarez, hunto cu un grupo di Dominicanonan y organisacionnan entre nan, Grupo Folclorico Cultural Dominicano, Brigada di Bombero, Fundacion Caribe y Brigada di Bombero Empresarial Internacional a condena y rechasa cualkier intencion di bin cu un cambio riba nan bandera nacional. E dia ey nan a haci un demostracion. Nan a bin cu nan banderanan di Republica Dominicano cu e escudo para den dje.

Ta asina cu dilanti e busto di nan heroe di independencia, Juan Pablo Duarte, Tavarez a bisa cu den e Dia di Constitucion Dominicano, nan kier expresa nan preocupacion ya cu ‘nan kier elimina locual ta trata e escudo for di e bandera di Republica Dominicana.’

Tavarez a bay den historia bisando cu den 1844 e bandera Dominicano a keda introduci y nan no ta permiti bou niun circunstancia cu e bandera di Republica Dominicana su escudo ta wordo elimina. Tavarez a bisa cu nan no tin informacion concreto tocante e intencion di kita e escudo for di nan bandera nacional. Pero si tin un situacion cu andando, mirando cu e comunidad Dominicana residencia rond mundo, tambe ta vocifera e tipo di preocupacion aki.

Nan ta haciendo un yamada na tur Dominicano pa uni nan mes na e causa aki. Tambe el a pidi pa nan uza nan simbolonan patriotico, specialmente nan bandera tricolor Dominicano tur dia durante e temporada aki. Igualmente el a declara cu e fundacion aki ta disponibel pa suministra cualkier informacion tocante e asunto aki.