Den un comunicado di prensa, Jeremiah Schwengle, presidente di Fundacion Commandeursbaai, a duna di conoce un carta cu a manda na BID cu nan reaccion riba un reunion cu e fundacion a sostene cu prome minister demisionario, Evelyn Wever-Croes, relaciona cu expansion di Aruba Ocean Villas.
“Na prome lugar nos ta gradici y aprecia cu Su Exelencia pa den un corto tempo, a concede nos fundacion tempo y atencion pa nos carta como [interesadonan] den e proyecto pa expansion di Aruba Ocean Villas, hunto cu directornan di departamento concerni p DIP, DNM y DLV”, e carta ta cuminsa.
“Como meta di nos Fundacion pa sali na defensa di nos naturalesa na Savaneta, ta lamenta cu ta solamente 30 minuut nos a ricibi pa por reuni, ya cu no por a yega na un miho resultado y acuerdo mas balansa, pa e rooi hunto cu e saliña por sigui florece y contribui na un structura ecologico den balans. Por a sinti mas bien cu a wordo informa cu a legalisa y crea tereno den area caminda ta un rooi y su saliña pa conecta pa lama. Esaki lo bay tin consecuencia desastroso pa habitante den cercania. Ademas nos a ricibi un sorpresa cu hasta den lama por construi. Tur esaki sin transparencia cu e pueblo di Savaneta ta wordo informa debidamente.”
Despues, e fundacion ta delinea 4 punto pa cual segun nan, no a ricibi clarificacion durante e encuentro cu Wever-Croes dia 22 di april ultimo. Esakinan ta:
1. Copia DNM rapport pa construccion den saliña y lama di Commandeursbaai;
2. Copia di aprobacion di expansion di Aruba Ocean Villas;
3. Copia di hindervergunning otorga;
4. Copia di permiso di construccion (bouwvergunning)
a) Den saliña y rooi (con a legalisa;
b) Den lama (estudio di impacto riba naturalesa y prevencion di contaminacion).
Pa finalisa, a haci un yamado pa atende cu e puntonan ariba menciona. “Nos ta spera di por ricibi e documentonan ariba menciona y no ta laga pueblo di Savaneta cu e incertidumbre aki. Pueblo di Savaneta merece miho atencion cu un muraya di bamboo y un dak di rama di coco. Lo bay crea mas molester di awa y sangura, transforma saliña y cera rooinan pa mangrovesnan por sigui florece. Tur esaki ta cu e unico proposito pa privilegia un proyecto, cu hasta ATA tin su duda si ta pas den nos cultura di Aruba y bario di Savaneta”, e carta ta finalisa.
