Mediante un comunicado di prensa Fundacion Autismo Aruba a anuncia cu nan ta hopi orguyoso cu nan presidente, Carolina Thiel-Span, a ser selecciona como un di e 22 participante di 22 diferente pais cu lo participa den e training internacional di Erasmus+ titula “Building Bridges of Inclusion& Accessibility”, cu lo tuma luga di 31 di maart te 5 di april 2025 na Atenas, Grecia.
E fundacion a splica cu e training aki ta ser financia completamente pa e Erasmus+/Youth Programme di Union Europeo y ta reuni profesionalnan comprometi cu inclusion, accesibilidad y equidad social. E programa lo trata temanan importante manera interseccionalidad, identidad, empatia, y e manera con por traha y relaciona cu hende, pa crea un espacio mas inclusivo, sigur y solidario den comunidad di Aruba y profesion.
Den su aplicacion, Thiel-Span a bisa: “Aruba ta un mosaico cultural, y e training aki lo duna nos un bista practico riba manera pa crea un ambiente mas inclusivo pa hende cu autismo y otro trastornonan di desaroyo.”
El a agrega: “E experiencia aki lo yuda nos hiba back perspectivanan nobo y herment util pa Aruba, pa yuda educador, trahadornan social y profesionalnan cu ta traha den comunidadnan diverso. E training aki ta relaciona directamente cu nos mision pa promove equidad y inclusion den tur nivel di sociedad.”
Segun e comunicado participantenan a ser selecciona riba base di nan motivacion y compromiso pa promove inclusion y accesibilidad den nan comunidad. E training lo enfatisa strategianan practico pa sostene equidad, comprension y inclusion cu significancia pa tur hende.
Fundacion Autismo Aruba ta sigui cu su esfuersonan pa boga pa un sociedad caminda diversidad ta balora, y tur hende – sin importa nan habilidad of background – por haya oportunidad igual, e sosten necesario y respet.
Den luna di juli aña pasa Thiel-Spana biaha pa Peru pa participa den Latin America Autism Summit 2024 y pa participa como orador y mustra como ehemplo den region pa e forma di comunica tocante autismo y logra crea conscientisacion.
Thiel-Span tabata un orador caminda a haya e oportunidad pa conta un poco di nan forma di traha riba conscientisacion pa trece cambio y inclusion na Aruba. Esaki tabata un momento importante pa haya un miho idea di kico otro paisnan den Latino America ta experiencia como tambe pa compronde con pa anda cu diferente situacion similar.
Durante e evento aki tambe tabatin hopi profesionalnan presente di Merca cu tambe a comparti nan “best practices” den e ramo di autismo y nan asina tambe logra crea conexionnan nobo cu organisacionnan manera Autism Global cual tabata un di e organisadonan como tambe profesionalnan individual.
Dia 4 di april 2024 Fundacion Autismo Aruba tambe a marca historia cu su participacion na foro internacional na Nacionnan Uni titula “Call to Action” cu e meta pa boga pa un miho futuro pa personanan autista na Aruba.
Den e foro internacional aki nan a papia riba e desafionan cu tin na Aruba pa locual ta e aceptacion, inclusion y accesibilidad na recursonan pa hendenan cu autismo.
E fundacion a señala cu esaki tabata “Un experiencia inigualabel unda e mensahe di Fundacion Autismo Aruba su self-advocates Byron Lesire & Kay Quandus, mom-advocate Stephany van der Biezen-Croes y presidente Carolina Thiel-Span a ser comparti cu entre otro UNICEF, WHO, Autism Speaks como tambe delegacionnan di Philippines, Malaysia, Zambia, Bangladesh, USA y Qatar.”
