Presidente Cubano, Miguel Díaz-Canel, a considera diamars pasa como ‘menasante y sinberguensa’ e mensahe cu su par Mericano, Donald Trump, a skirbi cu ocasion di e aniversario di efemeride polemico na Cuba, unda el a priminti su apoyo pa logra e ‘libertad’ di e isla.
“Trump, pega cu e tradicion injerencista di Merca e emiti un mensahe menasante, manipulado y ‘sinberguensa’ contra Cuba, ayera dia 20 di mei, fecha cu ta señala e proclamacion di e republica neocolonial”, Diaz-Canel a bisa riba su cuenta di Twitter.
Dialuna pasa, e presidente Mericano a skirbi riba e mesun plataforma, cu riba Dia di Independencia di Cuba, tabata apoya e pueblo Cubano “den su buskeda di libertad, democracia y prosperidad. E regimen Cubano mester pone fin na e represion di Cubanonan y Venezolanonan”.
“Merca no lo keda cu brasa crusa mientras Cuba ta continua subvirtiendo e democracia na America”, Trump a agrega.
Merca ta aplica desde 1962 un blokeo economico contra Cuba, cu e fin di forsa un cambio di regimen, y a endurece e medidanan contra e isla desde e yegada di Trump na poder, y bora e acercamento cu su antecesor, Barack Obama, a cuminsa.
Washington ta culpa Cuba di incluso apoya militarmente e presidente Venezolano, Nicolas Maduro, e aliado mas cerca di Havana, kende Trump kier saca di poder.
E mensahe di e presidente Cubano a ser skirbi oranan prome cu a cuminsa na Havana un reunion di Conseho politico di Alba (Aliansa Bolivariano di e Pueblonan di Nos America), cu ta reuni Venezuela, Nicaragua, Bolivia y otro nacion di Caribe.
