Haci uso di tecnologia digital den eleccion 2021 ta depende si tin maximo 11 partido participando den e proceso, si entregamento di lista y coleccion di firmanan necesario usando mas tecnologia funciona y si logra cambia of agrega na e Kiesverordening.

Asina Presidente di Conseho Electoral Dr. Glenn Thode a splica ayera durante un conferencia di prensa digital cu a tuma mas di un ora y mey. Un conferencia di prensa sumamente necesario den luz di hopi inkietud pa e intencion pa haci uso di sistemanan di Dominion pa registra persona cu ta bay vota y tambe tabula e formularionan di votacion, esta e stembilijetten.

Segun Thode, Conseho Electoral tabata prepara pa introduci un sistema electronico a raiz di eleccion 2017, pero cu e pandemia di COVID-19 a percura cu mester a bin un urgencia cu introduccion pa asina sigura cu esnan cu ta bay traha na e urnanan electoral como tambe e votado ta menos exponi posibel na e virus. Thode a bisa cu e ta contento cu tin hopi interes pa e tema.

Eleccion durante pandemia ta urgi cambio

Di otro banda, aunke cu a prepara henter e sistema, incluso a reserva fondonan pa eleccion 2021, e hecho cu Gobierno a cay y a yama eleccion algun luna prome cu a anticipa, a crea un urgencia pa ilustra e adaptacionnan, esta e uso di sistema electronico pa sostene votacion.

“E votacion di 2021 lo ta mescos cu esun di 2017, cu excepcion cu ta haci uso di sosten electronico riba tres punto. E adaptacionnan aki, incluyendo esunnan di sosten electronico a keda determina en conexion cu e pandemia di COVID-19 y a base di recomendacion di Censo y Conseho Electoral di 2019. E meta di e cambionan ta na prome luga, pa evita mas tanto posibel e transmision di e coronavirus y elimina puntonan di preocupacion di eleccion 2017,” ta locual Thode a splica.

E logistica di eleccion 2021 lo ta den man di e servicionan tradicional manera Censo, Polis y DOW. Pero awor debi na e pandemia, DVG y Crisisteam tambe ta envolvi. Conseho Electoral ta encarga cu registro di partido, supervision di e proceso legal pa establece e participacion y hunto cu e servicionan, percura pa e proceso ta completamente legal y neutral.

Menos intercambio fisico

E cantidad di urna electoral, incluso esunnan special ta yega na 70 cu ta nifica ocho urna electoral adicional cu por sirbi 1000 votado. Cada votado lo haya un sugerencia riba su carchi di voto, cu un ora e por bay vota, pa asina evita aglomeracion na e urna electoral. Lo tin dos forma con e sistema electronico lo sostene e fluho, pa asina menos hende mester pasa papel di man pa man, pues menos posibilidad di transmision.

E intencion ta cu pa medio di software, personal di e urna electoral scan e codigo di e carchi di votacion cu e persona a ricibi, cu ta kita e necesidad pa tin contacto fisico cu obhetonan necesario pa vota. “E Presidente di e urna electoral lo tin un tablet pa scan e codigo pa mira si e ta cuadra cu e persona cu mester a haya e carchi di vota ey,” Thode a splica. “Si ta asina, e Presidente di urna electoral lo controla e identificacion di e persona, idealmente sin mester mishi cu esaki.”

Den otro palabra, ya lo no tuma e paspoort, rijbewijs of cedula for di e votado. E persona ta haya su biyete di votacion, ta drenta e hoki di vota, y ta sali cu su biyete dobla manera ley ta prescribi. Segun Thode, for di e momento cu e persona haya su stembiljet, no tin forma mas pa conecta e biyete ey cu e votado.

Cara abao riba scanner

Un otro cambio ta ora cu mester deposita e formulario. Unabes na e buson, mester habri e formulario y pone e documento cara abao y e mashin mes ta percura pa scan e y deposita e voto Aunke cu manera ta e caso cu tur eleccion ta un buson lo tin pa cada urna electoral, e biaha aki lo mester habri e stembiljet pa pone riba e scan. E forma con e mashin ta scan, ta cu e ta reconoce e bala cora y solamente ta registra e partido of e lista unda e bala cora ta riba dje. Si en caso cu un hende vota blanco, of yena mas circulo cu e potlood cora, tambe esaki lo keda detecta.

E Presidente di Conseho Electoral Glenn Thode a splica cu e forma con e logistica ta hinca den otro, lo no tin oportunidad pa wak pa ken a vota, ni e mashin lo scan ora cu e stembiljet a drenta den e buson. “E buson no ta conecta cu ningun sistema. E unico waya ta e waya di coriente. E ta completamente los di cualkier sistema di data,” Thode a enfatisa.

Resultado riba 25 di Juni ta preliminar

Na final, e sistema ta produci un conteo preliminar cu ta bay pa Hoofdstemburo. Pero cada Presidente di un urna electoral lo acceso na e stembiljetten cu ta keda e base di votacion. Den otro palabra manera ta e custumber, lo tin un resultado preliminario di eleccion 2021 riba e mesun dia di eleccion, esta 25 di Juni. Pero mescos cu ta e caso tur biaha, ta ora cu certifica e eleccion por duna e resultado final. Y e resultado final lo ta basa riba conteo na man di e stembiljetten. E diferencia ta cu e conteo na man aki, ya no mester sosode mas riba e mesun dia di eleccion.

Manera ta conoci, den su evaluacion, Registro Civil y Censo cu ta brinda e sosten na Conseho Electoral pa realisa eleccion, a bisa cu e trabao di e personal di urnanan electoral ta pisa. Ta un trabao cu ta cuminza 5’or di mainta y ta dificil pa den e tempo aki unda tin hopi mas persona ta vota, kere cu por cuminza conta na man despues cu e urnanan electoral cera, sin cu tin problema. Y netamente pa elimina problemanan, manera ta e caso cuater aña pasa, a scoge pa e sistema di tabulacion aki. Dr. Thode a splica cu na 2017, tabatin caso unda a tarda cu conteo y a bin hopi duda y na e urna electoral en cuestion, hendenan a aglomera pa mira kico ta pasando, cu ta algo cu definitivamente no kier pa sosode e biaha aki.

Cambio di ley

Un otro cambio ta e ley. Dr. Thode a bisa cu na e momentonan aki, e cambionan rekeri ta den preparacion y cu e tin e informacion cu por logra haci e ahuste na e Kiesverordening pa permiti cu ta haci uso di sistema di tabulacion electronico.

Di otro banda, e Kiesverordening, esta e ley di eleccion ta papia di e posibilidad di votacion digital, electronico en bes di e uso di stembiljet y no ta papia di conteo of tabulacion electronico.

Segun huristanan na Bon Dia Aruba, e aspecto aki ta nifica cu no por djis introduci un landsbesluit houdende algemene maatregelen, un lbham, pa un ahustacion temporario, sino cu mester bin cu un cambio di e ley mes, cu ta nifica cu Parlamento mester aprob’e. Sin e cambio di ley aki, lo no por introduci e sistema di scan y mester haci uso di e sistema tradicional.

Pa loke ta 11 partido maximo? Na e momento tin e perspectiva cu 12 partido ta bay entrega lista dia 7 di Mei proximo. Esnan cu tin asiento den Parlamento no mester di haya sosten di firma, cu ta AVP, MEP, RED y POR. Pues, ocho partido lo mester depende di firma di sosten, cu ta di personanan cu derecho di voto na Aruba, cu por firma pa un solo lista. Den pasado, ta poco partido no a haya sosten di e firmanan necesario. Si e ocho partidonan tur ricibi e 587 firma rekeri, anto e conclusion ta cu e sistema di eleccion, haciendo uso di sosten digital no por sigui y ta bay pasa pa eleccion sistema tradicional.

Dr. Glenn Thode a enfatisa cu mester tin confianza den tur hende cu ta traha den e logistica di eleccion, y cu den luz di e pandemia, keda sin haci cambio den sistema di eleccion, no ta un opcion.