Den cuadro di apertura di Acuril 2019 (Association of Caribbean University, Research and Institutional Libraries), directora di Biblioteca Nacional di Aruba (BNA), Astrid Britten a duna un cordial bon bini na tur e representantenan di e paisnan cu a bin di diferente parti di nos continente, pero for di Europa tambe, pa atende e conferencia aki den nos ‘dushi Aruba.’

Di antemano el a pronostica cu e conferencia aki di cinco dia lo bira uno masha productivo y yen di entusiasmo. Pasobra e tema di ‘Acceso y Oportunidad’ pa tur hende y e rol di bibliotecanan, archivonan y museonan di Caribe pa apoya e metanan di desaroyo sostenibel diseña pa Nacionnan Uni ta uno interesante. Segun directora di BNA, Acuril ta brinda tur e representantenan di e diferente paisnan e plataforma perfecto pa logra e metanan aki.

Britten a laga sa cu e agenda cu a wordo comparti pa logra e metanan di desaroyo sostenibel pa 2030 ta reconoce e responsabilidad cu e miembronan di Acuril tin den henter region di Caribe. Specialmente pa elimina e limitacionnan fundamental y permiti cu nos por tin un bon calidad di bida den un ambiente sostenibel den nos planeta Tera.

E reconocimento di e rol cu ta hunga e bibliotecanan, archivonan y museonan pa logra e metanan di un desaroyo sostenibel global, ta haci cu e destino aki ta wordo comparti. Pero tambe nan mester informa con e proceso aki ta canando cu e ehecucion di e agenda 2030.

“Acuril ta desea di contribui na e yamada universal pa bay den accion pa confronta e pobresa, protege nos planeta y garantisa pa tur pueblo y pais por disfruta di paz y prosperidad”, asina Britten a expresa.

E ta haya cu den e aspecto aki biblioteca ta hunga un rol fundamental. E ta agrega cu e bibliotecanan di nos region Caribe ta sigui percura pa cada un di nan por bira un embahador di nan respectivo biblioteca den nan comunidad dunando acceso y oportunidad pa tur hende. Cu e mentalidad aki nan lo por sigui traha, crece y logra metanan hunto, danki na e trabou conhunto nan lo por logra esaki.

Britten a duna gradicimento pa e apoyo cu nan a haya di parti di gobierno di Aruba y di minister Lampe. Tambe el a expresa palabra di elogio na e trabou cu e comite local organisado di Acuril 2019 a realisa pa e conferencia aki por a bira un realidad, y specialmente na Lourdes (Des) Croes kende ta co-chair local di e comite aki. Tambe na tur e team cu a traha pa finalmente e conferencia anual aki ta wordo celebra na Aruba.