E tema di cannabis medicinal ta keda un debate pa hende den comunidad. A puntra Parlamentario Marisol Lopez Tromp (POR), kende ta na cabes di Comision di Salud den Parlamento, con ta evaluando e desaroyo.
Lopez-Tromp ta bisa cu den programa di gobernacion ta skirbi cu lo introduci cannabis medicinal, pues ‘esey no ta un discusion’. Unda cu a palabra, ta hinca den programa y ta locual ‘nos tur ta sostene’.
El a laga di sa cu ora el a bin parlamento, nan a haya e producto di ley pa nan wak con ta cumpli cu locual a palabra y con ta reglamenta esey. “E topico ta algo cu ta poni for di inicio.”
Sinembargo, e ta bisa cu por tin diferencia di opinion, pasobra ta haya cu tin hende kier pa legalisa cannabis recreativo tambe. E ta tende cu comentario di cannabis medicinal, entre otro, cu ta trece problema cu adiccion, pero ta riparabel rond di mundo cu esunnan cu ta uz’e ta haya alivio den malesa, ‘no ta secreto cu e ta yuda y sosode den varios pais’.
Hende ta prefera tuma cannabis medicinal na luga remedinan artificial, remedi cu ta duna mas efecto secundario cu efecto mes di remedi. “E realidad cu hende ta muri tambe cu medicamento cu ta duna efectonan secundario. Cannabis medicinal ta hinca den programa di gobernacion y ami ta sostene.”
