(AP) — Diadomingo, presidente di Colombia, Gustavo Petro, a bisa cu su gobierno no lo acepta vuelo cu ta carga migrante cu a ser deporta di Estados Unidos tanten cu e administracion di Donald Trump crea un protocol cu ta trata nan cu “dignidad”.
Petro a haci e anuncio den dos post ariba e red social X, un di cual ta inclui un video di noticia cu ta mustra migrantenan cu a ser deporta pa Brazil caminda nan pia y mannan tabata mara.
“Un migrante no ta un criminal y mester ta trata cu e dignidad cu un ser humano merece,” Petro a bisa. “Pa e motibo aki mi a debolbe e avionnan di militar Mericano cu tabata carga migrantenan Colombiano”.
Gobierno Mericano no a responde di biaha na nos peticion pa comentario di The Associated Press cu ta encarga cu e avionnan y protocol cu a ser usa den e deportacion pa Colombia.
Petro a agrega cu su pais lo ricibi Colombiano den “avion civil” y “sin tratamento di criminal.”
Como parti di e monton di accion pa cumpli cu e promesanan di Donald Trump di tuma control riba inmigracion ilegal, su gobierno ta usa servicio militar pa yuda proteha frontera y realisa deportacion.
Dos avion C-17 di Air Force cu a sali for di Merca cargando migrante a yega tera diabierna mainta na Guatemala. E mesun dia, Honduras a ricibi dos vuelo di deportacion cu a carga un total di 193 persona.
