Presidente di COFAVI, Jhonny Romero: Comunidad internacional mester yuda den caso di migrantenan Venezolano desapareci

Un tragedia nobo di migrantenan Venezolano cu ta expone nan bida pa busca un miho futuro for di e realidad cu nan propio pais ta bibando aden, a sosode den lama bruto. E hecho aki a conmove no solamente Venezuela, sino henter mundo, entre nan Aruba.

Constantemente nos ta conoce na Aruba e fenomeno di e migrantenan Venezolano cu ta risca nan propio bida abordo di botonan sin niun sorto di siguridad pa drenta ilegalmente via nos costa.

Tragedia

E biaha aki e no tin di haci cu Aruba, pero si cu e lamentabel acontecimento cu 21 cadaver a aparece hoga den e costanan di Guiria (estado Sucre). Un acontecimento cu ta uni na otro tragedia cu Bon Dia Aruba a yega di informa y cu nan ta keda den un misterio total.

Ta e casonan cu a yega di sosode di e migrantenan Venezolano cu a sali for di La Vela de Coro, Tiraya, Guiria y Anzoategui cu Sr. Jhonny Romero kende ta presidente di COFAVI a yega di denuncia via e matutino aki. COFAVI ta e comision di famia di victima di persona cu a disparce. Johnny mes a perde su yiu Jhonny de Jesus Romero cu a sali for di Coro de La Vela y te ainda nan famia no sa nada di dje.

El a bisa cu un biaha mas tin mas famia cu ta sufri victima di e desaparicion forsa y e sorto di migracion aki cu ta dunando como resultado e tipo di tragedia cu nan ta bibando actualmente. “21 persona mas a perde nan bida den lama bruto buscando e manera di scapa for di e crisis humanitario compleho di e pais aki,” el a declara na Bon Dia Aruba.

Romero a agrega cu antes cu a wordo informa di e tragedia aki, tambe a circula informacion cu den estado Sucre, cuater mucha muhe a wordo rescata for di e gara di un gang di traficacion di hende. E cuater mucha muhe aki tabata cla pa wordo bendi na Trinidad & Tobago. Entre e costanan di Guiria y esun di Chaguaramas na Trinidad & Tobago tin menos cu 100 kilometer cu a bira un trayecto activo di traficacion di hende of traficacion ilegal di migrantenan Venezolano.

E ta haya lamentabel cu un grupo di migrante ta logra di bandona nan pais por ta bendiendo nan poco pertenencia pa cera e suma di 300 pa 400 dollar pa aborda e boto pa yega na Trinidad & Tobago, unda nan a wordo “rechasa, desprecia y obliga pa bay bek.” Nan a termina den e tragedia aki cu a laga atras 21 persona morto.

El a bisa cu tin un rumor cu ta coriendo rond cu no tabata e boto aki so, sino cu e mesun famianan di e personanan cu a muri a bisa cu tabata tres boto cu a sali for di Guiria (estado Sucre) rumbo pa Trinidad & Tobago. Pero un boto so a aparece diadomingo na Trinidad, caminda nan a keda deteni. Pero e di tres boto ainda niun hende sa di nan destino.

“Personalmente mi ta masha malcontento y mi tin hopi rabia den mi curason, pasobra no por ta posibel cu cosnan asina ta sigui tuma luga den e costanan di Venezuela,” el a bisa. Pero pio ainda cu e cosnan aki ta bin sosode cu Venezolanonan cu a dicidi di huy for di nan pais buscando un forma di sobrevivi. Pero pio ainda, tur cos ta keda den un misterio hermetico riba kende a hiba nan y con nan a hiba nan.

El a bisa cu e tipo di boto aki no semper ta wordo tripula pa un capitan di boto honesto cu ta cobra pa e servicio brinda. Sino cu hopi biaha a migrantenan ta wordo gaña y nan ta wordo obliga pa bay otro sitio cu no tabata e destino original di biahe aki. Algun di e migrantenan aki nan deseo tabata pa bay e islanan ABC y nan ta para sin sa na Trinidad & Tobago. Esaki ta un historia cu ta bin sosodiendo mas ainda durante e ultimo dos aña.

Por ta cu e acontecimento aki por haya un impacto mas grandi of conmocion nacional y internacional. E ta haya cu esaki ta debi na e impacto di e potretnan horibel cu a wordo publica di e hecho aki. Pero e ta kere cu tur hende mester sa cu loke a sosode diadomingo ultimo cu e 21 cadaver, no ta algo nobo. Sino cu e tipo di tragedia aki ta sosodiendo durante e delaster 5 aña.

Comunidad internacional

Na aña 2018 a muri tambe 19 persona di e mesun manera y nan curpa apenas a wordo repatria recientemente. Nan tambe a muri den lama bruto hoga. P’esey e ta haci un yamado na e comunidad internacional pa mustra nan solidaridad pa atende cu e situacion aki, “pasobra akinan nos no sa mas unda nos por bati porta… Akinan Ministerio Publico ta cera e porta na e famianan, ora cu nan ta bay haci nan declaracion,” el a bisa.

E situacion ta asina caotico cu nan no sa na unda mas nan por entrega un denuncia of presenta prueba. Tampoco ken por scucha nan pa nan por wordo atendi debidamente. Niun investigacion ta wordo realisa. Husticia no ta prevalece y niun hende ta wordo condena.

P’esey nan ta lanta nan bos na nivel internacional pa asina e instancianan internacional por bin Venezuela. Of si nan por haci algo pa Venezuela su pueblo. Esaki ta un motibo pakico nan a bin cu un consulta popular debi cu na Venezuela niun instancia oficial ta scucha nan. “E burdugunan di e Venezolanonan ta e mesun autoridad di e gobierno cuminsando cu e presidencia,” Romero a laga sa.

Pa nan mes como famia di e 113 persona cu a disparce den cinco barco di Guiria (Sucre) y estado Falcon entre 2019 y 2020, e tragedia nobo aki no ta un sorpresa pa nan. Pero si nan ta condena cu e casonan lamentabel aki ta sigui sosode keto bay cu e tipo di desenlace tristo asina.